El númberu 135 de la revista Lletres Asturianes (LLAA), correspondiente al mes de marzu de 2026, llega con una marcada orientación hacia los estudios romanistes, consolidando la espublización como una referencia imprescindible nel ámbitu de la investigación sobre la llingua y la lliteratura asturianes.

Esti volume recueye una serie d’artículos científicos que traten cuestiones como la toponimia, la morfoloxía y la fonética y fonoloxía, aportando análisis y comparances que contribúin a enanchar el corpus d’estudios sobre l’asturianu y la so relación col restu de llingües romániques.

Ente los trabayos destaca Dende l’Ástura hasta la mar: entrar n’Asturies al traviés de la toponimia, de Xulio Viejo Fernández, que propón un percorríu pel territoriu al traviés de los nomes de llugar. Na mesma llinia d’estudiu, Javier Giralt Latorre analiza les afinidaes ente la toponimia asturiana y la aragonesa, ente que Jairo Javier García Sánchez examina los resultaos del llatín SURSUM, con SUB, na toponimia hispánica.

El númberu complétase con aportaciones sobre morfoloxía y fonética, como l’estudiu de Franz Rainer sobre l’orixe de los sufixos -deru y -dera del asturianu, el trabayu de Hugo Carbonnelle sobre la evolución d’un sufixu proto-románicu nos idiomes románicos, y la investigación de César Gutiérrez sobre l’ensordecimientu de consonantes oclusives sonores postnasales n’asturianu.

Con esti númberu, Lletres Asturianes sigue fiel al so oxetivu, dende la so fundación en 1982, d’asoleyar trabayos científicos orixinales centraos na llingua y la lliteratura asturianes, entendíes nun sentíu ampliu y na so rellación col ámbitu hispánicu y románicu.

La revista espublízase con periodicidá semestral, nos meses de marzu y ochobre, y pue consultase en formatu dixital al traviés de REUNIDO, la plataforma de revistes científiques de la Universidá d’Uviéu, asina como na páxina web de l’Academia de la Llingua Asturiana (ALLA).

This work is licensed under a Creative Commons Attribution 4.0 International License.