La primavera arranca güei en Xixón cola celebración de la Primer Sidre l’Añu, una de les cites más esperaes del calendariu sidreru y cultural n’Asturies. El Recintu Ferial Luis Adaro vuelve convertise nel epicentru d’una fiesta que combina sidre, tradición y folixa, atrayendo cada edición a miles de persones.

Tres l’éxitu del añu pasáu, cuando l’eventu s’averó a los 10.000 asistentes, la organización repite un modelu que furrula: una pulsera de 10 euros que da accesu a prebar llibremente la sidre de decenes de llagares, amás de participar en toles actividaes programaes. Un formatu pensáu pa tolos públicos, con especial atención a les families, que van atopar talleres, xuegos y propuestes pa toles edaes.

La programación inclúi conciertos diarios, talleres d’echar sidre, deportes tradicionales, tasties guiaes de sidres internacionales, concursos,  pruebes gastronómiques y actividaes infantiles, amás de la popular mayada de sidre.

La xornada inaugural arranca güei a les 13:00 hores col pregón, a cargu de la Plataforma contra la Contaminación de Xixón, incorporando asina una dimensión revindicativa al eventu y dando voz a la ciudadanía. Darréu van entregase los premios a la Meyor Primer Sidre l’Añu, que nesta edición reconocen a Sidra Germán (Avilés) como meyor sidre y oficial, con Contrueces (Xixón) y La Morena (Viella, Siero) completando’l podiu. El primer culín, a cargu d’Alejandra Vanegas, y l’escanciáu colectivu pondrán el broche a la apertura.

El programa de güei complétase con tasties de sidres ganadores y productos como’l choscu de Tinéu o’l quesu La Peral, una mayada infantil, un taller d’escanciáu y el conciertu d’Un de Grao.

Pero la fiesta nun acaba equí. Hasta’l domingu, la Primer Sidre l’Añu va siguir con una programación intensa que inclúi tasties internacionales —como sidres vascos, alemanes o irlandeses—, presentaciones de llibros, concursos, conciertos y actividaes pa la reciella.

Destaquen, amás, el concursu de sidre casero fecho en maera, que ya puede llevase pa participar -hasta’l sábadu a última hora- y que se va celebrar el domingu con presentación d’Odón del Paganéu.

Los horarios del eventu son de 13:00 a 21:00 hores güei xueves, de 12:00 a 21:00 el vienres y sábadu, y de 12:00 a 17:00 el domingu.

Cuatro díes pa brindar pola sidre nuevo, compartir cultura y vivir la Semana Santa como manda la tradición n’Asturies.