Una bones paez ser que’l so futuru se decide fuera d’Asturies y ante la inacción del gobiernu asturianu, el profesoráu qu’imparte l’asignatura de llingua asturiana lleva la so revindicación d’especialidá propia a Madrid

El profesoráu de Llingua Asturiana y Eonaviego decide dar un pasu más na so llucha histórica y treslladar la reivindicación al centru políticu del Estáu. Cerca d’un cientu de docentes y estudiantes de la especialidá viaxaron a Madrid pa facer visible una situación que, denuncien, arrástrase dende va más de cuarenta años: exercer la so profesión ensin una especialidá docente reconocida. Docentes, estudiantes, families y representantes sindicales y políticos concéntrarónse frente al Ministeriu d’Educación, Formación Profesional y Deportes en Madrid pa esixir la reconocencia de la especialidá docente de llingua asturiana.

La protesta desendolcóse en dos puntos clave, frente al Ministeriu d’Educación y delantre del Congresu. Ellí, los y les docentes protagonizaron una aición simbólica na que se encadenaron ente ellos, exhibiendo folios nos que figuraben los años de cada cursu escolar dende 1984, momentu nel que l’asturianu entró nel sistema educativu. Tres lleer cada fecha, la consigna repetíase con fuerza: «ensin especialidá».

La escena, acompañada de pancartes y banderes d’Asturies, despertó l’interés de viandantes y visitantes, especialmente na zona del Congresu.

Dende la organización valoren positivamente la visibilidá algamada, anque dexen claro que la presión va siguir. «Hai satisfacción pol impautu de la movilización, pero esto nun termina equí», señalen.

En paralelu a l’aición na cai, treslladóse una revindicación formal al Ministeriu. Nel documentu entregáu, el profesoráu reclama igualdá de condiciones col restu del personal docente, recordando que más de 300 profesionales tán desempeñando la so llabor ensin el reconocimientu que sí tienen otres especialidaes. La demanda nun pasa pola creación d’una figura nueva, sinón pola inclusión d’estes enseñances na normativa estatal que regula les especialidaes docentes, del mesmu mou que se fai con otres llingües con proteición llegal.

Les y los docentes insisten en que nun hai impedimentos xurídicos pa resolver esta situación y consideren que se trata d’una cuestión de voluntá política. Amás, recuerden que la so revindicación cuenta con un ampliu respaldu social n’Asturies.

Si nun se producen avances a curtia plazu, el colectivu nun descarta intensificar les movilizaciones dientro’l país, incluyendo la convocatoria d’una fuelga. Tamién insten al Gobiernu asturianu a mediar activamente pa facilitar un alcuentru pente docentes y Ministeriu pa dar una salida a un conflictu que, cuatro décades dempués, sigue ensin resolvese.

This work is licensed under a Creative Commons Attribution 4.0 International License.