Llogu de la Plataforma

Trátase d’un xestu simbólicu que venceya dos realidaes bien presentes na sociedá asturiana: la defensa del mediu ambiente y la celebración d’una de les mayores señes d’identidá cultural del país, la sidre.

La Plataforma contra la Contaminación de Xixón sedrá la encargada de dar el pregón inagural de la decimosexta edición de la Primer Sidre l’Añu, qu’arrancará el xueves dos d’abril a la una del mediodía nel recintu ferial Luis Adaro. 

La Primer Sidre l’Añu ye güei una de les grandes cites del calendariu sidreru d’Asturies. Cada primavera, Xixón convíertese nel epicentru d’esta fiesta que xunta a decenes de llagares y miles de persones alredor de la sidre nuevo. Nel eventu pue tastiarse la producción más recién de la temporada, acompañada d’actividaes culturales, llúdiques gastronómiques y musicales que recreen l’ambiente tradicional de les espiches . Amás, la celebración entama con un concursu que escueye la meyor Primer Sidre l’Añu, un reconocimientu que destaca la sidre más prometedora de la collecha y que protagoniza’l primer culín oficial del eventu .

Nesta edición, l’actu inagural va tener un significáu especial cola participación como pregonera de la Plataforma contra la Contaminación de Xixón. Esti colectivu ciudadanu, nacíu alredor de 2014 y venceyáu a asociaciones vecinales y ecoloxistes, lleva años denunciando los problemes de contaminación atmosférica na ciudá, especialmente los derivaos de l’actividá industrial y del tráficu pesáu . La so actividá céntrase na concienciación social, la presión a les alministraciones y la defensa de la salú pública, contribuyendo a poner nel centru del debate un problema que munches vegaes permanecía ocultu .

La eleición d’esta plataforma como pregonera supón reconocer el papel del movimientu ciudadanu na meyora del entornu y, al empar, recordar que la cultura sidrera —declarada patrimoniu cultural inmaterial— ta fondamente rellacionada cola tierra, la xente y un mediu ambiente saludable. 

Tres el pregón, nel mesmu actu van entregase los premios a la meyor Primer Sidre l’Añu, reconociendo’l trabayu de los llagares y dando’l pistoletazu de salida a cuatro díes d’actividá intensa alredor de la sidre.