El pregón d’esta edición de la Primer Sidre l’Añu, que se cellebra del 2 al 5 d’abril, va correr a cargu de la Plataforma contra la contaminación de Xixón, nuna decisión que busca dar voz a les inquietúes sociales de la ciudá y ampliar el conteníu del eventu más allá del ámbitu festivo.

Un momentu de la intervención de Marcos Abel Fernández, presidente de la Fundación Asturies XXI

Xixón va convertise, un añu más, nel epicentru de la primavera sidrera asturiana cola celebración de la XVI edición de la Primer Sidre l’Añu, que va tener llugar del 2 al 5 d’abril nel Recintu Ferial Luis Adaro. Cuatro díes nos que la sidre recién fecho, la música tradicional, la Cultura Asturiana de la Sidre y la convivencia van volver xunir a miles de persones nuna cita que medra ensin perder la so esencia.

La presentación oficial del eventu tuvo llugar na Casa Paquet, onde se punxo de manifiestu que la Primer Sidre l’Añu ye más qu’una folixa: ye una manera de tresmitir y caltener viva la cultura, de defender la identidá asturiana y de dar espaciu a los pequeños llagares.

El conceyal de Participación Ciudadana y Distritos, Abel Junquera, fixo fincapié nesi valor simbólicu, destacando que “cuando un eventu como esti medra y se consolida, lo que demuestra ye que la nuesa cultura sigue viva y con futuru”. Nesa mesma llinia, recordó’l compromisu municipal con una cita que yá forma parte del calendariu social de la ciudá.

Dende la Fundación Asturies XXI, organizadora del eventu, el so presidente Marcos Abel Fernández definió la Primer Sidre l’Añu como una espicha popular nel sentíu más auténticu del términu: un espaciu onde families y grupos d’amigos se xunten pa compartir sidre nuevo y tradición. “Nun ye un espectáculu, ye una experiencia participativa”, resumió, aludiendo al so calter integrador.

Un de los elementos que más se valoren del eventu ye precisamente esi calter abiertu. Frente a otros formatos más comerciales, la Primer Sidre l’Añu apuesta por una fórmula que combina degustación llibre de sidre — de decenes de llagares— con actividaes que van dende talleres d’echar sidre hasta deportes tradicionales, pasando por tasties guiaes, mayanza, conciertos o concursos. 

Marcos Abel tamién resaltó que la cita ta contribuyendo a dar visibilidá a pequeños productores. “La Primer Sidre l’Añu ayuda a democratizar la sidre”, esplicó Marcos Abel, al referise a les dificultaes que munchos llagares tienen pa llegar a los circuitos comerciales avezaos.

La cita va ser del 2 al 5 d’abril nel recintu ferial Luis Adaro. Como d’avezu, l’accesu al recintu va facese per mediu d’una pulsera —con un preciu popular— que va permitir probar llibremente la sidre de los llagares participantes y disfrutar de toles actividaes programaes.

La sidre ganadora de la Meyor Primer Sidre l’añu, ellaborada pol llagar Sidra Germán, va ser la oficial del eventu, seique habrá munchos más palos disponibles pa quienes quieran valorar como vien la sidre nuevo esti añu. 

La música va volver tener un papel protagonista. La Banda de Gaites El Gumial va marcar el ritmu del eventu a lo llargo de los cuatro díes, acompangada d’actuaciones de pandereteres, grupos folk y cantares de tonada, reforzando’l calter festivu y tradicional de la cita.

Otra de les claves del ésitu de la Primer Sidre l’Añu ye’l so impactu nel turismu. Anque se trata d’un eventu pensáu dende Asturies y pa Asturies, cada vegada atrae a más visitantes de fuera interesaos nun modelu distintu: un turismu que nun vien solo a mirar, sinón a participar, conocer y integrase.

Con esti plantegamientu, la Primer Sidre l’Añu sigue consolidándose como una de les grandes cites del calendariu asturianu, un espaciu onde tradición y presente s’axunten pa siguir dando vida a una de les señes d’identidá  del país: la sidre.