Palestina, Cuba, Ucrania, Venezuela, Oriente Mediu… la escalada bélica ya imperialista na que tamos venceyaos al traviés del colaboracionismu de la OTAN con EEUU ye inadmisible pal pueblu astgurianu que mañana va concentrase n’Avilés contra la guerra
Cartelu de la convocatoria
El mundu vive una nueva fase d’escalada bélica marcada pol papel central de los Estaos Xuníos y la OTAN. Dende Palestina hasta América Latina, pasando por Ucrania y el conxuntu del Oriente Mediu, los conflictos medren n’intensidá y extensión.
N’Ucrania, la guerra sigue activa tres más de cuatro años, con una implicación direuta de la OTAN al traviés del financiamientu, armamentu y cooperación militar, incluyendo nuevos paquetes millonarios d’ayuda.
La masacre continúa en Gaza, con un fuerte sofitu d’EE. UU. a Israel, incluyendo’l vetu a resoluciones internacionales d’alto’l fueu . A esto súmase la escalada reciente con Irán, que va espardiéndose per tou Oriente Mediu y onde la OTAN y Estaos Xuníos tán implicados militarmente.
América Latina tampoco queda al marxe. En Venezuela, la intervención militar estadounidense y el posterior bloqueu naval y económicu supunxeron un saltu cualitativu na confrontación, denunciáu incluso por organismos internacionales como una agresión contraria al drechu internacional . Esta intervención tuvo efeutos direutos sobre Cuba, onde EE. UU. intensificó la presión económica y enerxética, provocando una grave crisis con apagones y escasez y una situación de tensión qu’inclui preparativos ante una posible agresión, ya anunciada pol presidente estauxuniense.
Estos escenarios nun son conflictos aisllaos, sinón partes d’un mesmu procesu global d’escalada militar y confrontación imperialista, onde les grandes potencies compiten pol control de recursos, territorios y influencia política. Un procesu nel que territorios como Asturies tán venceyaos al traviés de la pertenencia del Estáu español a la OTAN y al alliniamientu cola política exterior d’Estaos Xuníos.
Ante esta situación, el colectivu Avilés pola Paz convoca una concentración mañana na plaza’l Parche, a les siete de la tardi, baxo’l llema “Non a la guerra, non al imperialismu”. La convocatoria pretende ser una respuesta social a esta dinámica de militarización y una denuncia del papel de les aliances occidentales nos conflictos actuales.
Dende la organización recuerden que “la clas obrera nun va a la guerra”, reivindicando una posición contraria a la participación indirecta en conflictos internacionales y apostando por una salida pacífica y xusta pa los pueblos.
This work is licensed under a Creative Commons Attribution 4.0 International License.
