Cuando les fuercies armaes del estáu entren nes escueles como espectáculu, lo que ta en xuegu ya’l modelu de sociedá que  ta construyéndose, un modelu que nos caberos tiempos pasa por normalizar la presencia del poder coercitivu dende la infancia.

El Colexu Públicu Reconquista de Cangues d’Onís foi escenariu esti día d’una nueva xornada de presencia de les fuercies de seguridá del Estáu nel ámbitu educativu. La Guardia Civil “tomó” el centru con una exhibición masiva d’unidaes, medios y demostraciones que, baxo la apariencia d’una actividá pedagóxica, vuelve poner enriba la mesa’l procesu d’adoctrinamientu institucional que se ta espardiendo nes escueles.

Al patiu del colexu desplazáronse efectivos del Equipu Territorial de Policía Xudicial (ETPJ), Seprona, Greim, Tráficu, Tedax, la Unidá Cinolóxica y l’Equipu Pegaso de drones. Un despliegue pensáu pa impresionar, que convirtió’l centru educativu nun escaparate del aparatu policial y qu’implicó activamente a la reciella, convidada a interactuar colos axentes, a ver vehículos, equipos y demostraciones espectaculares.

Estes actividaes, lloñe de ser inocentes, formen parte d’una estratexa clara de blanquiamientu y normalización de les fuercies armaes y policiales ente la población más nuevo. Un procesu que busca xenerar empatía y aceptación dende la infancia, presentando una imaxe dócil, cercana y desprovista de conflictu del aparatu represivu del Estáu.

Lo que güei se presenta como xuegu o entretenimientu ye, en realidá, una ferramienta de construcción simbólica. Una forma de naturalizar la obediencia, l’autoridá y el control social dende edaes tempranes. Los mesmos uniformes que güei se perciben como fonte de curiosidá y diversión son los que, en contestos de protesta o reivindicación social, exercen la represión, controlen movilizaciones y llenden drechos fundamentales.

Nesti sen, la entrada de les fuercies armaes nos centros educativos públicos supón una deriva esmolecedora escontra la militarización de la reciella. La escuela, que debería ser un espaciu seguru, críticu y emancipador, conviértese asina nun terrén d’influencia institucional onde se modelen percepciones y se refuercen valores d’aceptación del poder establecíu.

La falta d’alderique social y pedagóxicu sobre esti tipu d’actividaes agrava la situación. Nun se trata namás d’una visita puntual, sinón d’una tendencia xorreciente que s’estiende per tol país, cola participación cada vegada mayor de cuerpos policiales y militares na vida escolar.

This work is licensed under a Creative Commons Attribution 4.0 International License.