En contra de lo que venía dándose a entender por parte del Principáu, les directrices sectoriales sobre la implantación de bateríes n’Asturies nun van incluyir distancies de seguranza ente los contenedores, les viviendes y les esplotaciones agroganaderes.

Manifestamientu contra los parques de bateríes

Les directrices sectoriales sobre la implantación de bateríes n’Asturies nun van incluyir distancies de seguranza ente los contenedores, les viviendes y les esplotaciones agroganaderes.

Nun ye nenguna sorpresa. Ignacio Ruiz Latierro, Director Xeneral d’Ordenación Territorial, yá lo adelantara’l 31 de xunetu de 2024 nuna comparecencia xunto a Ovidio Zapico: poner distancies —afirmó entós— nun aportaba “seguranza xurídica”. Y da la circunstancia de que’l mesmu Latierro preside tamién la Comisión d’Urbanismu y Ordenación del Territoriu d’Asturies (CUOTA), l’organismu que precisamente recomendó establecer una distancia mínima d’un quilómetru ente les instalaciones de bateríes y los núcleos rurales, y de 500 metros coles esplotaciones agroganaderes y les viviendes venceyaes a elles. Asina que Latierro primero desaconseyó les distancies, dempués recomendóles y agora diz arrepentise de too ello.

El Director Xeneral d’Ordenación del Territoriu reconoció abiertamente que nun quier enfrentase a les empreses nos tribunales y que recomendó la distancia porque taba “baxo muncha presión”. En resume, que nun actuó nin actúa guiáu por lo que seya más recomendable o meyor pa los vecinos, sinón escoyendo en cada momentu’l camín que-y resultaba más fácil.

Les distancies de seguranza tuvieron mui presentes nos medios de comunicación y munches persones dan güei por fechu que van esistir, precisamente porque procedíen d’un organismu oficial como la CUOTA. Sicasí, según adelantó’l propiu director xeneral, les directrices nun van fixar distancies concretes. Nel so llugar van delimitar “manches” nel mapa d’Asturies: zones onde se podrán instalar bateríes y otres onde nun. Hasta que se publiquen les directrices —Ovidio Zapico anunció que previsiblemente será a finales d’abril— ignoramos con qué criterios se dibuxarán eses zones.

La confirmación de que’l Gobiernu del Principáu renuncia agora a incluyir distancies supón una contradicción más. Y vien sumase a la que yá denunciemos nel comunicáu del 11 de marzu: l’aumentu de les midíes contraincendios mentanto se caltién la evaluación ambiental simplificada pa proyectos que, polos sos riesgos, nun tendríen de tramitarse d’esa manera.

La principal razón oculta nesti cambéu ta nel fechu de que, pa afitar distancies nes directrices, el Principáu tendría que xustificales xurídicamente. Y pa facelo tendría que reconocer de mou explícitu que les bateríes suponen un peligru pa la ciudadanía. Daqué que, polo visto, quieren evitar a toda costa, magar que yá lo tán reconociendo de forma implícita col aumentu progresivu de les midíes contraincendios.

El Principáu, afirmen dende la Plataforma Stop Bateríes, nun s’atreve a formalizar esa peligrosidá nes directrices que van regular la so implantación n’Asturies. Porque reconocela de mou explícitu y siguir permitiendo estes instalaciones cerca de viviendes y esplotaciones agroganaderes dexaría al propiu Gobiernu señaláu en casu d’accidente.