La falta d’esplicaciones per parte del Conceyu de Salas y del Gobiernu del Principáu sigue marcando un casu que provocó una fuerte indignación social pola destrucción d’un elementu del patrimoniu tradicional
Cúmplense dos años del esbarrumbe ‘accidental’ d’una panera na villa de Salas, un fechu que provocó una fuerte reacción social tres espardise nes redes sociales les imáxenes del momentu nel que la estructura yera desaniciada con maquinaria pesada. Dende entós, el casu sigue ensin responsables claros nin soluciones visibles, nun exemplu que pa munchos colectivos evidencia la falta d’enfotu institucional na defensa del patrimoniu tradicional asturianu.
Tres conocese lo asocedío, dellos colectivos y organizaciones reclamaron esplicaciones inmediates. Ente ellos, Andecha Astur y Horru online pidieron al Conceyu de Salas aclaraciones sobre si l’esbarrumbe taba autorizáu, quién tomara la decisión y qué situación alministrativa tenía la panera. Les crítiques centraronse especialmente na posibilidá de que la estructura pudiera desmontase y treslladase, en cuenta de ser baltada.
Sicasí, dos años depués, la situación sigue ensin esclariase públicamente. Nun se conocen responsabilidaes polítiques nin alministratives pol esbarrumbe, nin tampoco se fixeron públicos informes concluyentes que permitan entender cómo pudo producise un error d’esta magnitú.
La crítica nun se dirixe namái al ámbitu municipal. Tamién el Principáu d’Asturies y la Conseyería de Cultura fueron señalaos pola so falta d’actuación posterior. Tres la polémica inicial y l’anunciu de revisar el casu dende la Dirección Xeneral de Patrimoniu, nun trascendieron midíes concretes nin actuaciones visibles pa reparar o compensar la perda.
Pa munchos colectivos venceyaos a la defensa del patrimoniu, esta inacción institucional resulta especialmente grave. Consideren que, más allá de determinar responsabilidaes, les alministraciones podríen impulsar dalguna midida simbólica o material, como la recuperación de la panera o la so reconstrucción, una posibilidá que nunca llegó a plantegase públicamente.
El casu convirtióse asina nun símbolu de la vulnerabilidá del patrimoniu etnográficu asturianu, especialmente cuando se trata d’elementos que nun tán formalmente protexíos o catalogaos. Horros y paneres formen parte esencial del paisaxe cultural d’Asturies, pero la so conservación depende en munchos casos de decisiones urbanístiques o alministratives que nun siempres prioricen la so protección.
Dos años depués del esbarrumbe, la pregunta sigue siendo la mesma: cómo pudo desaniciase una panera nel centru d’una villa histórica ensin que, hasta agora, nenguna alministración asuma responsabilidaes nin plantegue una solución. Pa los que defendieron la importancia del casu dende’l primer momentu, el silenciu institucional posterior resulta tan esmolecedor como’l propiu baltu.
This work is licensed under a Creative Commons Attribution 4.0 International License.
