El datu que más respiga ye’l que resume’l periodu 2017–2025: 12.466 persones morrieron n’Asturies mientres taben na llista d’espera del sistema de dependencia. D’esi total, 8.247 taben pendientes de la resolución del grau de dependencia y 4.219 aguardaben pol reconocimientu d’una prestación o d’un serviciu.

Nun se trata d’un desfase puntual nin d’una anomalía coyuntural, sinón d’un patrón sosteníu nel tiempu que revela un sistema incapaz de dar respuesta dientro de plazos razonables a miles de persones con necesidaes acreditaes o en procesu de reconocencia.

Los datos apúrrelos el XXVI Dictamen del Observatoriu de la Dependencia, que resalta que n’Asturies la mayor parte del fracasu del sistema concentrase na fase inicial del procedimientu. El 19,25% de les persones fallecies  taben pendientes de la resolución del grau de dependencia. Namái el 1,08 %, teníen yá’l drechu reconocíu pero siguíen esperando pola resolución de la prestación o serviciu, esto ye, pol PIA. l’80% restante correspuende a persones pendientes de valorar. Esti repartu indica que’l principal atascu del sistema ta na valoración y resolución inicial, anque tamién persiste un pequeñu pero significativu bloqueu na fase posterior, cuando’l drechu yá ta reconocíu pero l’atención efectiva entá nun llega.

Precisamente equí apaez ún de los datos más reveladores del exerciciu 2025: les 66 persones con derechu reconocíu que morrieron esperando prestación coinciden esautamente coles 66 persones que salieron de la llista d’espera nesi apartáu. La conclusión, según los datos, ye inequívoca: el 100 % de la reducción rexistrada nesi segmentu esplicar pol fallecimientu de les persones pendientes de prestación, y non pola actuación resolutiva de l’Alministración autonómica. Nun hubo, poro, una reducción efectiva del “limbu” atribuible a meyores de xestión, sinón una salida del sistema provocada pola muerte de les persones solicitantes. Ye difícil atopar una prueba más clara d’insuficiencia estructural.

Esti comportamientu permite falar, ensin esaxeración, d’una quiebra del oxetivu esencial del procedimientu de dependencia. Un sistema d’esta naturaleza ta diseñáu pa convertir solicitúes y valoraciones en drechos efectivos y, darréu, n’atención concreta. Cuando la salida del sistema se produz de manera sistemática por causes ayenes a la xestión alministrativa -ello ye, por muertes- lo que falla nun ye solo’l ritmu de tramitación, sinón la mesma capacidá institucional pa cumplir la so función social.

Tamién nel ámbitu presupuestariu Asturies apaez en posición de debilidá. El promediu de gastu públicu por persona dependiente asitiase en 4.045 euros, mui per debaxo de la media estatal de 6.015 euros, con un diferencial negativu del -32,7 %. Del mesmu mou, el gastu públicu per habitante ye de 137 euros añales, frente a los 194 euros de media estatal, esto ye, un diferencial del -29,3 %. 

Tampoco los indicadores d’espansión del sistema son positivos. Asturies atendió nel últimu exerciciu a 645 nueves persones dependientes, lo que supón un xorrecimientu del 1,95 %, mui perbaxo del 10,45 % mediu del restu de territorios. El númberu de persones valoraes crez namái un 2,20 %, cuando la media estatal foi del 8,80 %. Les persones con drechu a prestación aumenten un 1,72 %, frente al 9,02 % del conxuntu estatal.