El plazu d’inscripción pal Sidracrucis yá ta abiertu y con él vuelve una de les cites más singulares del calendariu sidreru asturianu. La iniciativa, entamada pola Fundación Asturies XXI xunto cola revista LA SIDRA, convoca cada añu a decenes de persones dispuestes a celebrar la cultura de la sidre como más presta: compartiendo sidre, bon ambiente y ganes de folixa
Tres de los participantes na solemne procesión
Nesta nueva edición el percorríu va tener como escenarios principales Avilés y Xixón. Ellí va desenvolvese esta peculiar procesión que cada primavera xunta a los “penitentes sidreros” nun itinerariu que combina chigres, llagar, fiesta de prau y espicha, ello ye, que de 12 del mediudíi a les 10 de la nueche completa una ronda pelos principales escenarios sidreros.
El día escoyíu, como ye vezu, ye’l Vienres Santu. Mientres la tradición española cellebra procesiones de tristura que percuerren les cais con llamentos, el Sidracrucis fai lo propio dende una perspectiva asturiana: celebrando la llegada de la primavera, l’apertura de los toneles y la pasión compartida pola sidre.
La actividá entama al mediodía na sede de la revista LA SIDRA, puntu de partida de la ruta. Ellí los participantes reciben les credenciales, les camisetes y los detalles del día. Ye tamién el momentu pa recordar les normes del Sidracrucis, entamar a calecer l’ambiente y entonar el cánticu que yá se convirtió nun clásicu de la cita: “Xermanín, Xermanín, échame un culete”, mientres s’abren les primeres botelles.
Dende esi momentu ponse en marcha la procesión sidrera. Los participantes van moviéndose ente distintes paraes, unes veces caminando tres la música de gaita y otres desplazándose n’autobús. El Llagar de Germán, la Primer Sidre l’Añu y diverses sidreríes xixoneses y avilesines formen parte esti añu del itinerariu que remata, como manda la tradición, nuna espicha final.
Les inscripciones tan abiertes y podrán facese nel teléfonu 652 59 49 83 o nel mail adlasidra@gmail.com
This work is licensed under a Creative Commons Attribution 4.0 International License.
