La dimisión del responsable de la lliquidación del Centru Portuariu d’Emplegu (CPE) d’Avilés prodúxose na tarde d’ayeri, xueves, depués d’un episodiu de tensión colos estibadores que lleven dos selmanes en fuelga.
Estibadores nos EEXX defenden a los avilesinos
Estibadores de puertos de tol mundiu solidarícense colos trabayadores avilesinos nuna demostración de fuercia y xunidá impresionante
La situación que derivó na dimisión diose na Travesía de la Industria, n’Avilés, onde un grupu de trabayadores portuarios interceptó’l vehículu del lliquidador. Al gritu de «nin un pasu atrás», los manifestantes impidiéron-y siguir la marcha durante dellos minutos, nun momentu nel que foi necesaria la presencia de la Policía Local pa restablecer la circulación.
Esti incidente asocedió poques hores enantes de que los estibadores conocieren otra noticia que cayó como un xarru d’agua frío: la Autoridá Portuaria d’Avilés desentiéndese de les reclamaciones de los trabayadores y decide nun intervenir como mediadora nel conflictu coles empreses del sector, negandose a asistir siquiera al conceyu convocáu p’abordar el conflictu.
Dellos sindicatos reclamaren precisamente esa mediación na xunta prevista pa esti mesmu xueves cola patronal de la estiba. Dende C.C.O.O. reclamaren tanto a l’Autoridá Portuaria como al Gobiernu del Principáu d’Asturies que «dexen el so perfil baxu», al considerar que’l puertu d’Avilés ye una infracadarma estratéxica que nun puede quedar «a espenses d’intereses empresariales a curtio plazu».
La fuelga arrincó hai cerca de trés selmanes tres l’anunciu de les empreses consignataries de disolver el CPE d’Avilés y asumir cada una d’elles, de manera individual, les operaciones de estiba nel puertu. Los sindicatos recuerden que, nel procesu de liberalización del sector n’España, el colectivu de la estiba defendió’l modelu públicu y colectivu frente a les presiones pa desmontalu.
Según denuncien, la desaparición del CPE respondería a una «decisión política y estratéxica» destinada a fragmentar al colectivu de trabayadores, debilitar la negociación colectiva y sustituyir emplegu estable por fórmules más precaries y a demanda. Poro, les organizaciones sindicales amosaron el so «apoyu total» a la fuelga de los estibadores d’Avilés.
La patronal, sicasí, caltién una visión bien distinta. Dende les empreses defiéndese que la liquidación del CPE permitiría meyorar la organización del trabayu nos muelles y aumentar la competitividá del puertu. «Queremos contar con tolos trabayadores portuarios pa facer d’Avilés un puertu más competitivu, más seguru y más eficiente», esplicó’l delegáu d’una de les principales consignataries del Principáu, afirmacion que pue tornase comu que cuenten ganar más perres a cuenta de los estibadores.
Nel marcu de les movilizaciones convocaes pol colectivu, pa’l sábadu 14 de marzu ta previstu un manifestamientu que saldrá a les 11.00 hores de la plaza de Vaticano, n’Avilés, y recorrerá diverses cais de la ciudá. Cabe destacar la fuercia de la solidaridá internacional nesti sector, con sofitos por parte d’estibadores de tol mundiu y concentraciones polos trabayadores d’Avilés que tan teniendo llugar en tolos continentes. Pa la protesta comprometiéronse a asistir representantes de la estiba d’otros puertos, incluyíos dellos del norte d’Europa y de la mariña atlántica de los Estaos Xuníos.
This work is licensed under a Creative Commons Attribution 4.0 International License.
