Los estibadores del Puertu d’Avilés caltienen activa la so protesta en defensa del Centru Portuariu d’Emplegu (CPE) y la estabilidá llaboral que reclamen dende qu’ entamaron la fuelga a mediaos de febreru

El colectivu convoca agora un manifestamientu pa’l día 14 de marzu, que partirá a les 11.00 h de la plaza del Vaticano y tendrá presencia de representantes de la estiba de puertos del norte d’Europa y de la costa atlántica de los Estaos Xuníos, según anunciaron los propios trabayadores.

La protesta vien motivada pola intención de delles empreses de liquidar o disolver el CPE, una decisión que, según denuncien los estibadores, nun garantiza la continuidad del emplegu ni la estabilidá salarial y podría acarretar mayor precarización y dispersión de la plantilla. Los paros y concentraciones ya acumulen delles semanes, ensin avances significativos nes negociaciones col empresariu.

Los estibadores reclamen la continuación del CPE de Avilés, que, na so opinión, vien furrulando “con resultaos económicos y d’emplegu excelentes” durante más de 30 años. D’alcuerdu col sindicatu mayoritariu del sector, SEPRA, el CPE ye un instrumentu que garantiza la xestión colectiva y estable de los puestos de trabayu nes actividaes portuaries.

El conflictu tien un creciente sofitu internacional de sindicados venceyaos a la organización International Dockworkers Council, que dan respaldu a los estibadores na so revindicación por un modelu de trabayu portuariu dignu y estable.

Mientres, los estibadores aseguren que, a pesar de la dureza de la movilización, tan garantizándose los servicios esenciales y l’atención a la mercancía peligrosa y perecedera nel puertu, mientres la huelga. L’Autoridá Portuaria d’Avilés y parte de la patronal consideren que “nun hai razón pa prolongar la fuelga” ya insten a desconvocar los paros y retomar la normalidá de la actividá portuaria.

This work is licensed under a Creative Commons Attribution 4.0 International License.