El XV Congresu Nacional de la Sociedá Española d’Oftalmoloxía Veterinaria va celebrase los díes 20 y 21 de febreru nel Palaciu de Congresos de Xixón

Material promocional del anterior congresu SEOVET

La Sociedá Española d’Oftalmoloxía Veterinaria (SEOVET) va celebrar el so XV Congresu Nacional en Xixón los próximos 20 y 21 de febreru, nel Palaciu de Congresos de la ciudá. L’actu cuenta col sofitu del Conceyu de Xixón, el patrociniu de Visita Xixón Convention Bureau y la collaboración del Palaciu de Congresos.

Ye la primer vegada que’l congresu nacional de SEOVET se celebra fuera de la so sede habitual en Madrid, escoyendo Xixón como ciudá anfitriona. La cita foi presentada güei na Casa Conceyu de Xixón, nun actu nel que participaron l’alcaldesa, Carmen Moriyón, y el presidente de SEOVET, Francisco Cantero.

Cantero destacó’l significáu especial que tien esti congresu tanto a nivel profesional como personal. “Pa min ye especialmente prestosu celebrar el nuestru XV congresu en Xixón porque supón xunir nun mesmu actu les dos mios pasiones: la oftalmoloxía veterinaria y la mio tierra. Amás, descentralizar la nuestra sede ye un fechu hestóricu pa SEOVET, y comprobamos con satisfaición qu’esta edición ye un ésitu de convocatoria, con cerca de 200 congresistes confirmaos”, señaló.

El presidente de la entidá amosó tamién la so confianza “na amabilidá de Xixón y nos profesionales que van atender a los participantes, ufriéndo-yos lo meyor de la ciudá y de la so xente”.

SEOVET ye una organización nacional en clara puxanza, qu’axunta a más de 300 miembros —oftalmólogos veterinarios— procedentes d’España, Europa, el Reinu Xuníu, Estaos Xuníos y América Llatina.

Baxo’l títulu “Ciruxía avanzada de córnea y catarata”, el congresu va cuntar cola participación de tres referentes internacionales del ámbitu científicu y oftalmolóxicu: Hans Westermeyer, Eduardo Huguet y Rodrigo Pinheiro de Lacerda.

A lo llargo de les dos xornaes espérase la presencia d’un númberu importante de llaboratorios procedentes d’España, Francia, el Reinu Xuníu y Portugal, amás de la asistencia de más de 200 congresistes de distintos puntos del mundu. Un fechu que confirma’l crecimientu esponencial tanto de la disciplina veterinaria como de la propia institución organizadora, y l’interés creciente de los especialistes pola oftalmoloxía veterinaria.

This work is licensed under a Creative Commons Attribution 4.0 International License.