La situación llaboral de más de 300 docentes d’asturianu sigue ensin resolvese tres la última contestación del Gobiernu central a una entruga parllamentaria formulada sobre la posible modificación de los Reales Decretos que regulen la so situación. La respuesta, recibida depués de dos meses d’espera, nun entra nel fondu de la cuestión y remite de forma xenérica a les competencies autonómiques.

La entruga formulada yera clara: si’l Ministeriu contempla la modificación de los Reales Decretos que caltienen a más de 300 docentes nuna situación d’inestabilidá estructural y desigualdá llaboral. La rempuesta, remitida pol Gobiernu Central depués de dos meses d’espera, non.

Na so contestación, el Ministeriu llímítase a señalar que, “en virtú de la Llei Orgánica 3/2020, les comunidaes autónomes pueden incluyir determinaos niveles educativos nel so ámbitu competencial”, ensin esclariar si se contempla dalgún cambéu normativu que permita superar la inestabilidá estructural y la desigualdá llaboral qu’afeuta al profesoráu de llingua asturiana.

Esto nun ye nuevo. L’ausencia de concreciones nun ye un fechu puntual, sinón parte d’una dinámica repetida que vien caracterizando la xestión d’esta problemática dende va años.

La situación del profesoráu d’asturianu, señalen dende l’asociación d’educadores ADAE, lleva enquistada décades, calteniendo a más de 300 profesionales nuna precariedá permanente. Esta realidá, añaden, tien reflexu direutu nel sistema educativu y na enseñanza de la llingua, ensin que se produxeren avances normativos significativos que dean salida a la so regularización.

L’alderique vuelve agora al ámbitu autonómicu. El próximu miércoles va tratase na Xunta Xeneral del Principáu d’Asturies una Proposición Non de Llei que busca instar al Gobiernu del Principáu a solicitar formalmente al Ministeriu la modificación de los Reales Decretos afectaos, un compromisu que yá figuraba nel Pactu Asturies Educa.

Anque la competencia normativa correspuende al Estáu, les organizaciones docentes recuerden que’l Gobiernu del Principáu tien una responsabilidá política direuta na defensa del so personal docente. Nesta llinia, reclamen una implicación más activa del executivu asturianu pa esixir soluciones concretes y coordinaes col Ministeriu d’Educación.

ADAE solicitó de manera urxente que se convoque una reunión cola ministra d’Educación y que se estableza un calendariu claru de trabayu. L’asociación tamién confirmó que la situación foi comunicada formalmente al presidente del Principáu y a la conseyera d’Educación. En función de la respuesta institucional nos próximos díes, nun descarten un endurecimientu de les acciones reivindicatives y la convocatoria de movilizaciones.