La Coordinadora Ecoloxista d’Asturies vien de denunciar los vertíos que tan produciéndose nel puertu d’El Musel, na zona onde se ta realizando la llimpieza de contenedores marítimos.
Los efeutos de los vertios son visibles
La llimpieza de contenedores faise nuna parcela de los muelles de la Nueva Osa, xunto al helipuertu, al descubiertu y ensin dalu tipu de proteición llateral nin nel suelu. La zona nun cuena con canaletes que torguen la entrada de les agües pluviales y nun se recueyen tolos residuos que se xeneren nes operaciones de llimpieza, que finen llegando a la mar cuando llueve. Estes agües contaminaes tampoco se recueyen nel colector del puertu pa la so correuta xestión, tratamientu y depuración.
Cuando se producen episodios de lluvia, denuncien, arrástrense tolos productos químicos y sólidos contaminantes presentes nos contenedores, provocando la consiguiente contaminación del suelu y de les agües mariñes. Estos vertíos prodúcense, amás, xusto a la altura de la captación d’agua de la nueva piscifactoría de llinguaos, lo que podría afectar seriamente a la calidá del agua que s’usa nesta instalación.
Resulta evidente que la llimpieza de contenedores marítimos que ta realizándose nel Musel nun cumple los requisitos mínimos pa considerase un llugar afayadizu pa llimpieces téuniques y procesos de desinfeición, que son imprescindibles pa elementos fundamentales del tresporte marítimu.
Ye de destacar qu’un puertu que presume de caltenibilidá concentre nel so espaciu tantes actividaes contaminantes, con afecciones direutes al aire, a l’agua y al suelu, una situación que la Coordinadora Ecoloxista vien denunciando dende hai décades.
Pela so parte, la Conseyería de Movilidá comunicó que, de momentu, nun tien previsto comprobar si los vertíos tán o non autorizaos, lo que causa una fonda sorpresa. Resulta evidente que nun se toma en serio l’impactu ambiental de les actividaes portuaries, nin siquier dende l’Autoridá Portuaria. Namái hai que recordar que la so actual presidenta, Nieves Roqueñi, cuando exercía como conseyera permitió numberoses tropelíes ambientales, una xestión que-y valió recibir la Buyada Purpurina pola so llaceriosa actuación nesti campu.
Susana Sela
This work is licensed under a Creative Commons Attribution 4.0 International License.
