La Revista LA SIDRA participa estos díes na CiderCon, la principal cita internacional del sector sidreru, que se celebra en Providence (Estaos Xuníos), con una presencia centrada nel aprendizaxe global, la proyección de la sidra asturiana y la creación de redes internacionales pa’l futuru del sector.

La cultura sidrera asturiana ta presente esta selmana na CiderCon de Providence al traviés d’una representación de la Revista LA SIDRA, que participa nesti alcuentru internacional col envís de conocer de primera man la evolución del sector sidreru a nivel mundial y compartir la esperiencia d’Asturies nun foru global.

L’asistencia a talleres, ponencies y espacios d’alderique permite afondar nes nueves tendencies de producción, comunicación y consumu de sidra, al tiempu que se produz un intercambiu directu con productores y profesionales procedentes de distintos países. Dende LA SIDRA, esti procesu d’aprendizaxe entiéndese como una ferramienta clave pa siguir analizando’l presente y el futuru de la sidra como productu cultural y económicu.

Xunto a la vertiente formativa, la presencia en Providence tien tamién un marcáu calter divulgativu. La revista ta aprovechando la CiderCon pa dar visibilidá a la sidra d’Asturies, poniendo en valor el so modelu productivu, la so tradición histórica y la so rellación fonda col territoriu y la identidá cultural.

Nel marcu del eventu, LA SIDRA ta trabayando amás na busca de productores y profesionales interesaos en participar en futures ediciones del Salón Internacional de les Sidres de Gala (SISGA), que se celebra en Xixón nel mes de setiembre y que se convirtió nun puntu de referencia pa les sidres d’alta calidá a nivel internacional.

De la mesma manera, tán manteniéndose alcuentros pa dar a conocer la filosofía de Cider Cities, una iniciativa que promueve la cooperación ente ciudaes y territorios venceyaos a la sidra, col oxetivu de reforzar la so dimensión cultural, turística y económica, y de texer redes que contribuyan a un desarrollu sostenible del sector.

La participación de LA SIDRA na CiderCon supón, asina, un pasu más na proyección internacional de la sidra asturiana y nel compromisu pola difusión d’una cultura que forma parte esencial del padremuñu d’Asturies.

This work is licensed under a Creative Commons Attribution 4.0 International License.