Decenes de trabayadores de la planta d’Ence-CEASA en Navia salieron a les cais nesta selmana como parte de la llucha  contra’l Espediente de Regulación de Emplegu (ERE) que pretende la empresa pa suprimir 96 puestos de trabayu y afectar a un total de 184 persones, casi la mitá de la plantilla directa de la factoría asturiana de celulosa.

Cartelu de convocatoria del manifestamientu

La protesta entamó con una fuelga d’una selmana, convocada pola representación sindical del comité d’empresa, que busca paralizar completamente l’actividá de la fábrica y forzar a la dirección d’ENCE a reconsiderar el so plantegamientu, ante’l nulu avance de les negociaciones. El conflictu prende por la intención d’eliminar un terciu del emplegu na factoría, una medida que los representantes de los trabajadores califiquen d’“inxustificada” y “atentáu social” pola so repercusión n’Asturies occidental, acusando a Ence d’aprovechar una coyuntura temporal de baxos precios de la celulosa -que ya tan recuperándose- pa xustificar un ERE innecesariu. Hai que recordar que la empresa recibió más de 53 millones d’euros en sovenciones públiques dende 2021, munches venceyaes al caltenimientu del emplegu.

Nun de los momentos más tensos de la movilización, los trabayadores instalaron barricaes a les puertes de la fábrica pa impedir l’accesu y la salida de la factoría, interrumpiendo el pasu de los directivos con fueu y petardos y atacando los coches de los responsables de la situación. 

Les protestes nun quedaren namás nel entornu de la factoría, sinón que tamién se vio un ampliu respaldU social y institucional, con declaraciones de solidaridá cola plantilla dende dellos plenos municipales, espresando que’l mantenimientu del emplegu ye esencial pa’l futuru socieconómicu de la zona y que la decisión de la empresa tendría graves consecuencias pa la comunidá.

L’ERE non supondrá namás perda de puestos sinón, al tiempu, una precarización de la ocupación, cola sustitución de emplegu estable por emplegu esternalizáu y peor pagáu.

Ta previstu un manifestamientu multitudinariu el próximu domingu nel centru de Navia, que partirá dende la estación d’autobuses, faciendo un percorríu pela villa naviega.

Nel Dos Santos

This work is licensed under a Creative Commons Attribution 4.0 International License.