SUATEA entama esti sábadu, 31 de xineru de 2026, un actu d’homenaxe y alcordanza al compañeru Tino Brugos, que va celebrase a les 11:00 hores nel salón d’actos del IES de La Iría, asitiáu na cai La Regenta, 4, n’Uviéu.

L’actu quier ser un espaciu de memoria compartida y reconocimientu a la trayeutoria vital, política y sindical d’un profesor d’historia fondamente comprometíu col so tiempu y cola tresformación social. A lo llargo de la mañana van intervenir distintes persones que compartieron con él militancia, actividá y vida, intercalándose les pallabres con actuaciones musicales y la proyección de material audiovisual.

Tino Brugos foi una figura clave en numberoses causes sociales y polítiques. Collaboró na creación de los COSAL y de XEGA, militó primero na Liga Comunista Revolucionaria y, más tarde, en SUATEA–Confederación Intersindical–Intersindical Asturiana. Foi miembru de la revista Viento Sur y destacó especialmente pola so implicación nos movimientos de solidaridá con Palestina, col pueblu del Kurdistán y nel movimientu antimilitarista.

Amás, desarrolló un trabayu constante pola memoria democrática, participando activamente na Fundación Andreu Nin y en La Comuna d’Asturies, amás de venceyase a una llarga llista d’iniciatives sociales y polítiques. En toles elles dexó una manera de facer marcada pola participación activa, el rigor, la construcción colectiva y un respetu escrupulosu pola autonomía política de los movimientos.

Dende SUATEA señalen que l’actu quier reconocer non solo la militancia y el compromisu de Tino Brugos, sinón tamién la so calidá humana y la huella fonda que dexó nes persones y colectivos colos que compartió llucha y camín.

L’homenaxe ye abiertu a toles y tolos que quieran asistir, hasta completar l’aforu del salón d’actos.

Susana Sela

This work is licensed under a Creative Commons Attribution 4.0 International License.