L’Institutu d’Educación Secundaria Fernández Vallín, de Xixón, acueye estos díes la esposición La muyer en Xixón, Asturies (1934-1937), un proyeutu entamau pola Fundación Asturies XXI y subvencionáu pol Conceyu de Xixón dientro del Área de Memoria Democrática.

Los rapacinos accedieron a la información a traviés de QRs

La muestra ta concebida como una esposición itinerante que, dende’l mes d’avientu y nos meses vinientes, va percorrer distintos centros de Formación Profesional y secundaria, amás de centros culturales del conceyu.

La esposición tien l’oxetivu de poner el focu nel papel de les muyeres asturianes nel periodu que va dende la Revolución d’Ochobre de 1934 hasta la cayida del Conseyu Soberanu d’Asturies y Llión. La muestra ta comisariada pola investigadora y xestora cultural Alma Hidalgo, autora d’un trabayu que xune investigación histórica, restauración fotográfica y divulgación, pensáu especialmente pa un públicu mozu.

El proyeutu susténtase nun fondu ampliu d’investigación y recuperación documental, que permitió reconstruyir la presencia —siempres fundamental y, munches vegaes, invisibilizada— de les muyeres nesi periodu históricu. El procesu incluyó la restauración dixital de decenes de semeyes procedentes d’archivos públicos y coleiciones privaes, dando llugar a una fototeca temática centrada na vida cotidiana, el trabayu, la resistencia y la implicación social femenina.

Les imáxenes recueyen escenes de vida privada y llaboral, del mundu obreru, de la movilización popular, l’actividá sindical y la solidaridá vecinal, y retraten una Asturies que sostenía la vida en plenu contestu de represión y guerra. La fototeca inclúi materiales orixinales restauraos y documentación complementaria accesible per aciu d’un códigu QR, que permite al públicu acceder a conteníos audiovisuales, testimonios orales y documentos d’archivu, disponibles yá en tolos institutos de Xixón. El profesoráu destaca l’interés que la muestra despierta ente l’alumnáu, que s’amosa especialmente atraíu poles imáxenes de muyeres guerrilleres, al aportar un puntu de vista nuevu sobre cómo yeren y cómo vivíen les muyeres n’Asturies va unes décades.

La esposición ta enfocada de mou especial a moces y mozos d’ente 12 y 16 años, polo que incorpora testos pedagóxicos y contestualizadores, accesibles a traviés de QRs, pa facilitar la comprensión del papel de les muyeres na vida política, social y familiar d’aquelles décades convulses.

Tres la so inauguración nel IES Fernández Vallín, La muyer en Xixón va percorrer otros institutos y asociaciones culturales del conceyu, col enfotu d’averar la memoria democrática al ámbitu educativu y al texíu social llocal.

Susana Sela

This work is licensed under a Creative Commons Attribution 4.0 International License.