El conxuntu bermeyu blancu asesta dos goles dende los once metros y Guille Rosas pon la guinda al pastel con un drechazu dende la frontal, dexando a los ‘jabatos’ como colistes de la categoría

El partíu arrancó de mou sorprendente, col conxuntu colista de la división presionando, mordiendo y monopolizando les acciones principales del partíu. Sicasí, el fútbol nun perdona, y la presión dende les grades qu’exercía la Mareona, xunto cola insistencia de Juan Ferney Otero, forzaron a Iker Córdoba a cometer un error garrafal dientro de la so propia área nel descuentu de la primer parte. Esa aición costó-y la segunda tarxeta mariella, dexando al so equipu con un home menos pa la segunda metá. Juanfer nun falló y executó con finura al palu drechu. Gol. Fin del primer tiempu.

La segunda metá entamó con un vendaval d’ocasiones y errores. Nos primeros minutos, Guille Rosas protagonizó una arrancada increíble dende la banda derecha, apaeciendo por sorpresa y rematando ensin aciertu; y Rubén Yáñez salvó un córner que s’envelenaba na parte opuesta del terrén de xuegu. La efervescencia medraba nes grades y el marcador favorecía al conxuntu llocal; poco a poco el Mirandés afloxaba y el Sporting medraba. Xusto cuando esa dominancia yá yera más clara, Otero volvió enredar a la defensa mirandesa nuna xugada atropellada, recibiendo una entrada ensin balón y xenerando otru penalti, cediendo nesta ocasión a Dubasin el privilexu de batir la rede defendida por Juan Palomares.

La última llegó de les manes d’ún de los favoritos de la afición. Con un home menos y perdiendo por dos goles, el conxuntu de Miranda pisó l’acelerador, y l’equipu de Borja Jiménez aprovechó los espacios pa romper de mou sistemáticu’l sistema defensivu d’Antxón Muneta. Nuna d’estes xugaes y con l’área repleta de piernes, el balón llegó-y a Guille Rosas na media lluna. Colocó’l cuerpu y armó’l disparu buscando la escuadra derecha, o eso creyeren tolos presentes en El Molinón, porque nengún de los xugadores sobre’l verde, nin tampoco los miles d’asistentes al estadiu, esperaben esi disparu cruzáu a media altura, pegáu al palu derechu, poniendo’l broche d’oru a un partíu redondu onde los de Borja llévense tres puntos que reconforten a una plantilla y a una afición que yá sueñen col ascensu direutu, a namás dos puntos de distancia.

Nel Dos Santos

This work is licensed under a Creative Commons Attribution 4.0 International License.