Imaxe corporativa del blog Astures, un proyectu independiente de divulgación histórica y arqueolóxica centráu nel patrimoniu cultural d’Asturies.
Un regodón con restos de pintura atribuibles al periodu aziliense foi notificáu a los servicios de Patrimoniu tres ser atopáu en superficie xunto a un dolme en Ribedeva. L’afayamientu foi dau a conocer al traviés del blog Astures, especializáu en divulgación histórica y arqueolóxica.
El descubrimientu y la posterior comunicación a l’Alministración fueron realizaos por Alfonso Sánchez, autor de la entrada publicada nel blog y responsable del proyeutu Astures y del afayamientu del regodón.
Un proceder exemplar na defensa del patrimoniu
Tres identificar la pieza, Alfonso Sánchez notificó’l afayamientu a Patrimoniu al traviés del rexistru oficial, actuando conforme a la normativa vixente y facilitando la intervención de los servicios arqueolóxicos del Principáu. Esta actuación responsable garantiza la protección del patrimoniu cultural y pon en valor el papel de la ciudadanía comprometida cola conservación del pasáu.
El regodón, visible en superficie y a curtia distancia de la cámara del dolmen, presenta marques pictóriques en tonos escuros y collorados en dambes cares, compatibles colos regodones pintaos del Aziliense, una cultura del final del Paleolíticu.
Un afayamientu d’interés arqueolóxicu
Los regodones pintaos azilienses, con una cronoloxía aproximada ente’l 10.000 y el 8.000 a.C., son bien conocíos n’otros contestos arqueolóxicos, pero resulta poco avezao atopalos venceyaos a estructures megalítiques, qu’en xeneral correspuenden a etapes bien posteriores.
N’Asturies, los exemplos documentaos d’esti tipu d’elementos asociaos a dólmenes son mui escasos, polo que’l afayamientu abre nueves llinies d’investigación sobre la posible reutilización simbólica d’espacios sagraos a lo llargo del tiempu.
Recoyida y estudiu de la pieza
Dempués de la notificación, un arqueólogu del Principáu recoyó’l regodón, que foi treslladáu al centru museísticu correspondiente pa la so conservación, documentación y analís. El procesu garantiza la custodia llegal y l’estudiu científicu de la pieza.
Dende l’ámbitu de la divulgación histórica ye de destacar la importancia del trabayu realizáu dende iniciativas independientes como’l blog Astures, asina como la relevancia del proceder responsable del so autor, que contribúi de manera direuta a la protección y conocencia del patrimoniu arqueolóxicu asturianu.
This work is licensed under a Creative Commons Attribution 4.0 International License.
