La radiotelevisión d’Asturies nun pue siguir furrulando d’espaldes a la so propia realidá llingüística ya’l cambeu de dirección ye una oportunidá de camudar eso
La dimisión del anterior director de la Radiotelevisión del Principáu d’Asturies (RTPA), Francisco G. Orejas, abre un procesu de renovación nel que la Xunta Xeneral tien que proceder al nomamientu d’una nueva dirección. Pa Iniciativa pol Asturianu, esti momentu tien de servir pa poner fin a una situación que calificen como “una clara anomalía llingüística”: la escasísima presencia del asturianu nos medios de comunicación públicos asturianos.
La organización considera que la RTPA lleva años incumpliendo la so responsabilidá social y llegal como serviciu públicu. Recuerden que tanto l’Estatutu d’Autonomía de 1981 como la Llei d’Usu y Promoción del Asturianu de 1998 establecen la obligación de fomentar y garantizar la presencia de la llingua propia nos medios de comunicación. Del mesmu mou, la Carta Europea de les Llingües Rexonales o Minoritaries, ratificada pol Estáu español en 2001, señala de manera espresa la necesidá de crear canales de radio y televisión que funcionen nes llingües propies.
Lo que ta pasando n’Asturies ye una esceición negativa nel conxuntu del Estáu y d’Europa. Mientres n’otres comunidaes con llingua propia los medios públicos emiten de manera normalizada na so llingua, la RTPA caltién una programación práuticamente monollingüe en castellanu, con una presencia del asturianu testimonial y claramente insuficiente.
L’asociación recuerda que’l Mandatu Marcu aprobáu l’añu pasáu pol propiu ente públicu afita la necesidá d’aumentar l’usu de les llingües propies nes emisiones. Sicasí, denuncien que dende entós nun se produxo nengún cambéu real nin se tomó nenguna midida que permita falar d’un avance significativu.
Pa Iniciativa pol Asturianu resulta fundamental que la persona que se ponga al frente de la RTPA seya dafechu consciente d’esta realidá y tenga una sensibilidá clara cola normalización llingüística. La entidá esixe tamién que’l procesu de nomamientu seya tresparente y que se valoren de manera prioritaria los méritos llingüísticos de les persones candidates.
Susana Sela
This work is licensed under a Creative Commons Attribution 4.0 International License.
