Los espresidentes Pedro de Silva, Juan Luis Rodríguez-Vigil y Javier Fdz posen con Adrián Barbón xunto al retratu d?Areces
Adrián Barbón sorprendió estos díes reivindicando públicamente la figura de Vicente Álvarez Areces y llamando a “recuperar el so espíritu”. Dicho asina, paez un xestu de memoria histórica interna del PSOE asturianu. Pero si s’analiza con un poco de perspectiva, la cosa tien muncha miga.
Porque, claro, cuando se fala d’Areces, fálase d’un dirixente que tuvo al frente del poder institucional asturianu más de dos décades: doce años como alcalde de Xixón y otros doce como presidente d’Asturies, pa rematar como senador en Madrid. Nesi llargu percorríu dexó tres de si una estela de corrupción ablucante, pasando a la hestoria como ún de los mayores responsables del esfarrapamientu económicu, social, medio-ambiental y cultural d’Asturies, con implicación en casos como’l d’El Musel, Riopedre o’l Casu Villa, o Niemeyer.
El blanquiamientu de la so figura foi costante dende l’entamu por parte d’aquellos que tuvieron implicaos y se beneficiaron del so sistema mafiosu: Medaya d’oru d’Asturies, fiu predilectu de Xixón... quienes taben chiscaos pola so corrupción fexeron lo posible por emponderalu, tratando de camudar la hestoria y d’ocultar incluso sentencies xudiciales. Poro, que Barbón presente agora a Tini como ‘una referencia pa les xeneraciones nueves, un exemplu de serviciu públicu y de defensa d’Asturies’ mete mieu.
Barbón nun quier recordar cuál foi’l llegáu real d’aquellos años: precariedá llaboral, desindustrialización acelerada, despoblación creciente, emigración forciada de miles de moces y mozos, y una política llingüística marcada pola represión y l’abandonu del asturianu. Y, sobremanera, resulta imposible falar d’Álvarez Areces ensin mentar la llarga solombra de la corrupción que marcó parte del so mandatu. El conocíu como casu Riopedre o casu Marea, xulgáu y sentenciáu pol Tribunal Supremu, confirmó la esistencia d’un sistema d’axudicación de contratos públicos fondamente corrompíu en delles conseyeríes del Gobiernu asturianu. Prevaricación, malversación, cofechu y falsedá fueron delitos acreditaos xudicialmente que afeutaron de manera directa a persones del entornu más cercanu d’Areces, como’l que fuera conseyeru d’Educación, José Luis Iglesias Riopedre.
El mesmu Tribunal Supremu afirmó na so sentencia que nos años de gobiernu d’Areces “quedó sustancialmente corrompíu’l procedimientu d’axudicación de contratos”, afeutando non solo al padremuñu públicu, sinón al conxuntu del sistema alministrativu asturianu. En términos políticos, aquello foi definío como un periodu de corrupción sistémica.
Y, sicasí, nunca se depuraron responsabilidaes polítiques reales. Areces finó ensin tener que dar cuentes por nada, y poco dempués foi homenaxáu col títulu de Fíu Predileutu de Xixón y cola Medaya d’Oru d’Asturies, nun xestu que pa munchos resultó una burlla a la ética pública, entamándose darréu una recoyida de robles pa que se-y foren retiraos esos honores.
D’ehí que la llamada de Barbón a “recuperar” el so llegáu suene, como mínimo, inquietante. ¿De qué parte del llegáu tamos falando? ¿De l’Asturies que perdió industria y población? ¿De la que vio cómo se desmantelaben sectores estratéxicos mientres se consolidaben redes clientelares? ¿De la xabaz represión llingüística? ¿O d’esi sistema políticu que permitió que la corrupción campare a les sos anches ensin que naide asumiera responsabilidaes?
Recuperar ciertos “espíritus” pue significar, acencielles, volver a les andaes y recuperar –si ye que dalguna vegada s’abandonaron– les táctiques mafioses y clientelares del PSOE n’Asturies. Y eso, visto lo visto, nun paez precisamente una bona idega.
Llucía F. Marqués
This work is licensed under a Creative Commons Attribution 4.0 International License.
