La selmana vien cargada d’iniciatives venceyaes a la defensa del mediu ambiente y a la participación ciudadana n’Asturies. Dende charres divulgatives hasta alcuentros asociativos, distintes entidaes del país entamen actividaes abiertes a toles persones interesaes.
El llunes 19 de xineru, a les 19.00 hores, va tener llugar n’Avilés la charra-coloquiu titulada “Vida marina diminuta del Cantábricu”, a cargu del profesor Ricardo Fernández. La xornada ta entamada pola asociación Mavea y va celebrase nel Centru Social El Ñeru Verde, asitiáu na cai El Marqués númberu 19 d’Avilés.
El miércoles 21 de xineru hai doble cita. Pela tarde, a les 18.00 hores, ta convocada una concentración vecinal na Plaza del Conceyu d’Uviéu, coincidiendo cola celebración del Conseyu de Mediu Ambiente. L’actu ta entamáu pola asociación Ecos de Lluera, que llama a la ciudadanía a participar pa visibilizar les sos reivindicaciones.
Esi mesmu día, a les 19.30 hores, va celebrase tamién n’Avilés una xunta de la Rede de Representación Ambiental d’Asturies. L’alcuentru va ser nel Centru Social de Llaranes y va sirvir pa coordinar trabayos y estratexes ente distintes organizaciones del ámbitu ecoloxista.
Yá pal fin de selmana, el domingu 25 de xineru, hai otres dos propuestes. Pela mañana, a les 10.00 hores, ta programáu un Alcuentru d’Asturies pol Decrecer nel barriu de Xove, en Xixón, dedicáu a reflexonar sobre modelos de vida más caltenibles y alternatives al consumismu.
Pa finar, confírmase na tarde del domingu un Alcuentru d’Entidaes d’Educación Ambiental, entamáu pola Asociación Asturiana d’Educación Ambiental (AENAT). Va ser a les 15.30 hores, nel Centru Social El Ñeru Verde d’Avilés. Esta cita busca favorecer el contactu y la collaboración ente colectivos que trabayen nel ámbitu educativu y ambiental.
Una selmana, en definitiva, con múltiples oportunidaes pa participar, aprender y implicase na protección del entornu natural d’Asturies.
Nel Dos Santos
This work is licensed under a Creative Commons Attribution 4.0 International License.
