Barcos de pesca amarraos en Tazones

La Federación de Cofradíes de Pescadores d’Asturies anunció que güei entama una füelga que va paralizar l’actividá,  quedando presllaes les rules del país. La decisión tómase como protesta poles nueves esixencies del Reglamentu de Control de la Xunión Europea, qu’entraron en vigor el pasáu 10 de xineru y que, según el sector, resulten inasumibles pa les embarcaciones artesanales.

Dende la organización pesquera espliquen que dos de les midíes incluyíes na normativa europea tán pensaes pa grandes flotes industriales, pero que nun s’axusten a la realidá de los barcos asturianos, que trabayen cerca de la mariña y con xornaes curties.

La primer obligación cuestionada ye la de comunicar con cuatro hores d’antelación el puertu de descarga y la cantidá de pexe capturao. Les cofradíes alvierten de que, na práctica, esta esixencia obligaría a munches embarcaciones a esperar en mar abiertu pa cumplir col plazu fixáu, lo que podría xenerar situaciones de riesgu pa les tripulaciones y retrasos innecesarios nel regresu a tierra.

La segunda midida problemática tien que ver cola declaración de capturas dende’l kilogramu cero. Nel casu de la flota de baxura, que pesca distintes especies en pequeñes cantidaes, considérase imposible calcular con exactitú’l pesu de cada una d’elles a bordu del barcu. Según el sector, esta obligación pue provocar errores inevitables que deriven en sanciones desproporcionaes, al nun poder garantizar midiciones exactes en condiciones reales de trabayu.

La Federación recuerda que la pesca asturiana yá ta sometida a controles estrictos y a sistemes de trazabilidá bien desendolcaos, polo que considera que la nueva normativa “nun aporta meyores reales” y, sicasí, xenera más burocracia y inseguridá.

El paru convocáu va caltenese, según anunciaron, hasta conocer el resultáu de la xunta que se va celebrar esi mesmu llunes en Madrid ente representantes del sector y la Secretaría Xeneral de Pesca, onde va intentar buscase una solución que permita adaptar el reglamentu a les característiques de la pesca artesanal del Cantábricu.

Les cofradíes confíen en que darréu el Gobiernu estatal tresllade a Bruxeles la necesidá d’introducir esceiciones o mecanismos flexibles pa evitar que la normativa europea acabe poniendo en peligru la viabilidá económica d’un sector fundamental pa munchos puertos asturianos.

Llucía F. Marqués

This work is licensed under a Creative Commons Attribution 4.0 International License.