Antena de la polémica, tirada embaxo

La movilización vecinal consiguió paralizar esti llunes la instalación d’una antena de telefonía móvil nel centru d’El Condao, nel conceyu de Llaviana. Los vecinos y vecines opunxéronse a la obra al considerar que la infraestructura taba prevista a una distancia escesivamente cercana a les viviendes, a escasos diez metros, y que podría xenerar problemes tanto de salú como de calidá de vida.

L’antena, destinada a dar cobertura 5G a la zona, sustitúi a otra anterior, pero con unes dimensiones sensiblemente mayores: supera los quince metros d’altura, lo que foi percibío pola vecindá como un empeoramientu notable del impactu visual y ambiental nel nucleu del pueblu.

La protesta ciudadana llevó al Ayuntamientu de Llaviana a intervenir nel procesu. El martes pela tarde, el consistoriu decidió parar oficialmente la obra dempués de revisar la tramitación del proyeutu. L’alcalde, Julio García, esplicó que la Llei de Telecomunicaciones permite la instalación de repetidores a partir d’una declaración responsable de la empresa promotora, siempre que se cumplan determinaes condiciones.

Nelcasu d’El Condao, ún d’esos requisitos —el referíu a la superficie máxima del terrén a ocupar, fixada en 300 metros cuadraos— nun s’axustaba al proyeutu presentáu, yá que se sobrepasaba. Esti desaxuste foi clave pa que’l consistoriu tomara la decisión de paralizar la actuación y esixir a la empresa que redacte un proyeutu completu y solicite la llicencia correspondiente.

Amás, dende l’Alcaldía señalose que s’aprovechó la situación pa mediar ente la compañía telefónica y la vecindá, col oxetivu de buscar un emplazamientu alternativu que cause menos perxuiciu. “Hai que garantizar que nos pueblos y nes zones rurales podamos disfrutar de les mesmes comodidaes y redes de telecomunicaciones que na ciudá, pero tamién hai que facer les coses d’alcuerdu colos vecinos”, afirmó Julio García.”.

Según esplicó, la empresa promotora precipitóse al entamar la obra ensin falar previamente nin col Ayuntamientu nin colos vecinos. Agora, el Gobiernu municipal confía en que se pueda algamar un alcuerdu satisfactoriu pa toles partes, que permita garantizar l’accesu a la rede 5G ensin imponer una infraestructura a pocos metros de les cases.

El casu d’El Condao vuelve poner de relieve’l pesu de la organización vecinal y la importancia de la participación ciudadana nes decisiones que tienen un impactu direutu sobre’l territoriu y la vida diaria de la xente.

This work is licensed under a Creative Commons Attribution 4.0 International License.