Ensin Oficialidá de la llingua d’Astuires ye imposible una Asturies democrática

Les negociaciones de los Presupuestos del Principado d’Asturies vuelven a dexar una evidencia incómoda: la llingua asturiana nun forma parte de les prioridaes polítiques reales. Nin el Gobiernu nin los grupos que tán negociando les cuentes consideraron siquier la oficialidá como un elementu a poner enriba de la mesa. Nun ye que nun seya posible: ye que nun se quier discutir.

Falóse de fiscalidá, d’inversiones, de pactos necesarios y de vetos cruzaos. Falóse de gobernabilidá y d’estabilidá. Pero nun se faló de drechos llingüísticos, nin d’oficialidá, nin de correxir una situación d’inferioridá xurídica que dura dende hai décades. Otra vuelta más, la llingua propia d’Asturies quedó reducida a un asuntu secundariu, prescindible nel momentu decisivu: el de los presupuestos.

La oficialidá nun ye un símbolu vacíu. Ye la ferramienta xurídica que permitiría garantizar presencia real del asturianu na educación, na Alministración, nos medios públicos y na vida social. Nun plantegala ye asumir que la precariedá llingüística ye aceptable y que puede siguir aplazándose ensin costes políticos.

Pero la responsabilidá nun recae solo nel Gobiernu. Tamién nos grupos que tán negociando y sosteniendo les cuentes, y de manera especial en quien tien un papel decisivu nel resultáu final. Resulta especialmente significativo que Covadonga Tomé, clave pa la aprobación presupuestaria, nun plantegue la oficialidá nin nengún avance estructural en materia llingüística. El silenciu, nesti casu, nun ye neutral: ye una toma de posición.

Dende l’asociación N’Ast denuncien que esta situación nun ye nueva, sinon la continuación d’una política de paripé, especialmente por parte del PSOE, que nun pasa del discursu simbólicu ensin conteníu real. Señalen que la falta d’oficialidá nun ye l’únicu problema: ye solo la cara más visible d’un paralís xeneral.

N’Ast recuerda que nun se ta avanzando na escolarización real n’asturianu, que sigue siendo opcional, desigual y ensin garantíes. Tampoco nun se consolidó una presencia digna y estable del asturianu na televisión pública asturiana, onde sigue ocupando un papel marxinal. Nos ayuntamientos onde gobierna’l PSOE, y tamién n’aquellos dirixíos por partíos que se declaren favorables a la llingua, nun s’apliquen polítiques coherentes que normalicen l’usu del asturianu na vida del conceyu y na atención a la ciudadanía, cuando nun son direutamente represores llingüíssticos, como pasa n’Illas (IU).

La crítica estiéndese tamién a esos partíos y representantes que, en teoría, dicen defender la llingua asturiana, pero que nun aprovechen les negociaciones clave pa esixir avances reales, convirtiendo la defensa del asturianu nun elementu retóricu ensin traducción política.

La conclusión ye clara: los presupuestos son una declaración de principios, y estos vuelven confirmar que la llingua asturiana nun ye una prioridá. Nin pal Gobiernu, nin pa quien lu sostién, nin pa quien podría marcar la diferencia y decide non facelo.

Mentanto, siguirán aprobándose cuentes millonaries ensin un cambiu de modelu, ensin valentía política y ensin drechos llingüísticos. Y siguirá medrando la distancia ente’l discursu públicu de proteición y la realidá d’una llingua que, presupuestu tres presupuestu, sigue siendo tratada como secundaria.

This work is licensed under a Creative Commons Attribution 4.0 International License.