La presencia de foques grises na costa asturiana volvió llamar l’atención nos caberos díes dempués de confirmase que varios exemplares mozos fueron avistaos en bones condiciones. En casu d’avistamientu, nun s’averar y si tan feries, llamar a emerxencies

Una d’elles, una cría que fuera rescatada d’un apareyu de pesca a media milla de la mariña nel occidente d’Asturies el pasáu día 15, volvió vese darréu ensin signos de problemes de salú. Les primeres sospeches de que pudiera tener un anzuelu na boca o tragáu quedaron, polo tanto, descartaes.

Amás d’esi exemplar, a lo llargo de la selmana localizáronse otres dos foques grises en distintos puntos del llitoral asturianu. En tolos casos trátase d’animales mui nuevos, con una edá que nun pasa, como muncho, de dos o trés meses. Ye avezao que nesta etapa vital les críes s’averen a la costa, bien pa descansar, bien porque inda tán deprendiendo a valese per sigo mesmes.

Dende les entidaes venceyaes a la conservación marina recuérdase la importancia de caltener una actitú de respetu si se topa con dalgún d’estos animales. Anque puedan paecer indefensos, les foques grises tienen una dentición mui potente y pueden causar feries si se sienten amenazaes.

Tamién ye fundamental controlar a los perros nes zones onde pueda haber foques. Si se pasea con mascota, convien llevála amarrada y alloñase del llugar si se detecta la presencia del animal, evitando situaciones d’estrés tantu pa la foca como pal propiu animal domésticu.

Nel casu de que se detecte una foca en mal estáu, con feríes visibles o con comportamientos anómalos, la indicación ye avisar darréu al 112 y poner el fechu en conocencia de les organizaciones conservacionistes correspondientes, que son les encargaes de valorar la situación y actuar si ye necesario.

Nel Dos Santos