L’actu d’homenaxe a Andrés Solar Santurio, Andresín el de Deva, foi muncho más qu’una ufrienda floral y un exerciciu de memoria. Foi, como nun podía ser d’otra miente, un espaciu pa reafitar compromisos políticos y pa mirar de frente al momentu críticu que vive anguañu’l país

La intervención política a cargu de Llucía Fernández, recoyó’l llegáu del homenaxeáu, señalando que la meyor manera d’honrar la figura d’Andresín nun ye namás recordalu, sinón siguir. Siguir falando claro, siguir organizándose, siguir construyendo alternatives dende la izquierda nacionaliega. Porque Andresín foi eso: un militante ensin ambigüedaes, un intelectual comprometíu y una persona que nunca tuvo mieu a dar la cara por Asturies, pola so llingua y polos drechos del pueblu asturianu. La so vida, intensa y fonda, foi un exemplu de coherencia ente pensamientu y aición.

Darréu la intervención punxo’l focu nel presente. Un presente marcáu pol xorrecimientu de la ultradrecha española, pola normalización del discursu reaccionariu y pola perda acelerada de credibilidá del PSOE, incapaz de dar rempuesta a les necesidaes sociales y les revindicaciones nacionales y, a la fin, corresponsable del presente escenariu. Un procesu que nun ye coyuntural, sinón estructural, y que tien consecuencies direutes sobre los pueblos ensin soberanía.

Nesti contestu, la organización informó de que ta agora mesmo en contautu con otres organizaciones nacionaliegues d’izquierda del Estáu español, col oxetu de coordinar respuestes comunes frente a la ofensiva reaccionaria. Nun se trata d’una suma artificial nin d’un frente electoral improvisáu, sinón d’estudiar complicidaes polítiques ente pueblos que comparten una mesma realidá: la d’un Estáu que niega drechos nacionales, precariza la vida y abre  pasu, con resignación o complicidá, a la ultradrecha.

La referencia a la perda de credibilidá del PSOE nun foi retórica. Foi una constatación compartida por amplios sectores sociales: promeses incumplíes, renuncies constantes y una xestión del poder que, lejos de frenar l’autoritarismu y el retrocesu en drechos, acaba facilitándolos. Frente a eso, reivindicóse la necesidá de construir alternatives nidies, dende la izquierda y dende los pueblos, ensin tuteles nindependencies.

L’homenaxe a Andresín acabó asina convirtiéndose nun puntu partida. Non nun llamamientu a la señaldá, sinón a l’aición. Como recoyíen los sos versos más conocíos, “Prúyemos un Pueblu Llibre”, una idega que sigue teniendo plena vixencia. Y como recuerda otru de los sos poemes, entá hai milenta razones que se llamen como nós y que tán esperando. Nun ye tiempu de galvana nin de silencios, sinón de organización y de compromisu.

Porque, como se dixo nesi actu, nin el cansanciu, nin la invisibilización, nin el ruiu de la ultradrecha van poder con un pueblu que decide siguir. “Seyamos pocos o munchos, la xera ye clara: facer del argayu un fueu y siguir avanzando”.

This work is licensed under a Creative Commons Attribution 4.0 International License.