Andecha Astur llama a visibilizar la obra escrita d’Andrés Solar col Hastag #AndresSolar nel 41 cabudañu del so fallecimientu
Esti sábadu 27 d’avientu, a les doce’l mediudíi nel Cimenteriu de Deva, Andecha Astur –heredera del Ensame Nacionalista Astur, partíu fundau pol poeta- homenaxeará, como ca añu, la so figura, resaltando les sos cualidaes personales ya’l so compromisu nacionaliegu, lleendo dalgunes de los sos poemes más conocíos y con una ufierta floral frente a la placa que la organización llantó hai años a la entrada del campusantu.
Miembru fundaor del Ensame Nacionalista Astur, presentándose por esi partíu como candidatu a la Xunta Xeneral, foi profesor de llingua asturiana na UP de Xixón, espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi tesoreru de l’Asociación d’escritores Asturianos y miembru de Conceyu Bable y de Xunta pola Defensa de la Llingua Asturiana, siendo en tou momentu un referente pola so implicación, capacidá de trabayu y cualidaes presonales.
Andrés Solar Santurio algamó na so curtía vida merecíu reconocimientu como autor; traxicamente fináu con namás 29 años, amosó una capacidá creativa, una claridá mental y una capacidá de compromisu pa cola causa asturiana estraordinaries, dexándonos escrites prestoses pallabres que dende Andecha Astur llamen a nun escaecer, animando a subir a redes sociales la obra escrita d’Andrés Solar, lleida, escrita o musicada, col Hastag #AndresSolar, pa visibilizar con ello al poeta nacional asturianu nel 41 cabudañu del so fallecimientu.
La obra d’Andrés Solar ye abondosa, fonda y cargada de conteníu, polo que consideren perimportante seguir dando voz a les sos pallabres, espardiéndoles peles redes en reconocimientu y alcordanza.
Collaborando con esa aniciativa, apurrimos dellos poemes pa que los nuesos llectores puedan participar na idega. Alcordaivos del #AndresSolar.
Prúyemos un pueblu llibre,
que nome cola so voz
los sos collacios ya’l pan,
prúyemos un pueblu llibre
y una Asturies Dixebrá”.
—————– . ——————–
El verde y la gaita
Nin valen nin sienten
Si dientro del pueblu
Nun fierve la xente
Falando futuru
Al son de pallabres
Qu’el mesmu pariere
Pero’l pueblu vive
Si dientro tien xente
Cincando-y les uñes
Nel puelgu al silenciu
————— . —————–
Toi buscando la manera de dicite
qu’hai milenta razones que se llamen como tu.
Y qu’esperen por ti, qu’esperen por ti.
A vegaes camiento cansáu
que nin siquiera sabrán que tuviemos equí,
asoleyando un país que cayó una nueche a la mar
y na mar y na nueche lu quixeren dexar.
Nin siquiera sabrán que tuviemos equí
cola voz y les manes falando d’amor,
falando de ti, falando de ti.
Pero ye igual,
hai que facer del argayu un fueu,
del vientu un hermanu qu’esparda’l calor,
qu’esparda’l calor.
Hai que siguir asina y equí.
Hai que siguir,
hai que siguir
This work is licensed under a Creative Commons Attribution 4.0 International License.
