La Madreñada, cellebrada ayeri per Uviéu, convirtió’l centru de la ciudá nun espaciu de visibilidá pal calzáu tradicional asturianu y pa la reivindicación del so valor cultural
La iniciativa, plantegada como la primer convocatoria d’esti tipu na capital, nació cola voluntá de sacar la madreña del ámbitu simbólicu o museísticu y devolvelu al usu públicu, anque seya de manera puntual y festiva.
A lo llargo de la mañana, les persones participantes percorrieron delles cais del centru calzaes con madreñes, tocando gaites y panderetes y acompañando la caminada con esplicaciones sobre la historia y l’usu d’esti elementu fundamental de la cultura material d’Asturies. La Madreñada desenvolvióse como un actu abiertu, ensin estructura competitiva nin calter folclorista estricto, apostando por una presencia natural nel espaciu urbanu y por un contautu direutu cola vecindá.
La propuesta incluyó tamién actividaes complementaries, como una visita guiada y un alderique informal alredor del papel de la madreña na vida cotidiana del país, tanto nel pasáu como nel presente. Dende la organización esplicóse que l’oxetivu ye abrir un camín pa futures ediciones y xenerar una reflexión colectiva sobre la perda d’usos tradicionales y les formes de recuperalos dende una perspeutiva contemporánea.
La Madreñada d’Uviéu inscríbese asina nun movimientu más ampliu de defensa del padremuñu cultural asturianu, apostando pola acción directa y pola ocupación consciente del espaciu públicu. Ayeri, la madera volvió sonar nes cais de la capital non como evocación señaldosa, sinón como un xestu presente, con voluntá de continuidá y significáu social.
Susana Sela
This work is licensed under a Creative Commons Attribution 4.0 International License.
