Una vez más, persones venceyaes al ámbitu educativu contacten con colectivos sociales p’advertir del avance d’alcuerdos y collaboraciones ente centros educativos asturianos y l’exércitu español. Nesta ocasión, xenera esmolecimientu la convocatoria de los denominaos “Premios Exércitu”, impulsaos pola propia Conseyería de Educación
Dende la Coordinadora Asturiana de ONGD y dende Andecha Astur denúnciase que esti tipu d’iniciatives que favorecen la propaganda militar nes aules son ca vegada más avezaes, con xures de bandera, demostraciones y visites de fuercies armaes nos centros educativos.
Como entidá antibelicista, la coordinadora considera especialmente grave que se promuevan valores venceyaos al militarismu nun contestu internacional marcáu pola proliferación de conflictos armaos.
Pel so llau, la formación política Andecha Astur espresa dende hai tiempu una postura firme contra la presencia militar y policial nos centros educativos. Pa esta organización, la escuela pública nun pue convertise nun escaparate de propaganda del exércitu español nin d’otros cuerpos armaos del Estáu. Andecha Astur denuncia que estes práctiques formen parte d’un procesu de militarización y españolización de la educación, nel que se treslladen a l’alumnáu valores d’obediencia, disciplina y subordinación venceyaos a una visión centralista del Estáu español.
Dende esta perspectiva, la formación nacionaliega considera que la educación pública asturiana tien de fomentar el pensamientu críticu, la cultura de la paz y el respetu ente pueblos, y non la glorificación de la fuercia armada nin del belicismu. Amás, defende que la escuela tien de contribuyir al afitamientu d’una conciencia social y cultural propia, llibre d’imposiciones ideolóxiques y ayena a discursos militaristes.
Resulta tamién especialmente llamativu que la fecha escoyida pa zarrar el plazu de solicitúes seya’l 22 de xineru, pola so cercanía col 30 de xineru, Día Internacional de la Non Violencia y la Paz. Delles organizaciones entienden esta coincidencia como una contradicción evidente ente los valores que se dicen promover y les actividaes que se fomenten dende l’alministración educativa.
Nesta mesma llinia, UNICEF afita na so web que los centros educativos han comprometese como espacios de defensa de la paz, del entendimientu y de la convivencia. Esta visión contrapónse de manera frontal a propuestes que promueven valores militaristes y una concepción acrítica de les fuerces armaes.
La posición d’estes organizaciones, xunto cola de tol movimientu pacifista asturianu, ta nidia: defender la Cultura de la Paz y alloñar de los centros educativos cualesquier conteníu o actividá que tea venceyada al belicismu. Nesti sen, Andecha Astur fai un llamamientu a la Conseyería d’Educación pa que revise estes polítiques y apueste por un modelu educativu coherente colos valores democráticos, pacíficos y sociales que diz defender la educación pública n’Asturies, entantu que la CODOPA manifestó la so disposición a caltener una xunta cola conseyera d’Educación, Eva Ledo Cabaleiro, col envís de presentar una rellación de temátiques alternatives que considera muncho más afayadices pa trabayar dende los centros educativos asturianos.
Nel Dos Santos
This work is licensed under a Creative Commons Attribution 4.0 International License.
