L’anti-galardón, que va entregase simbólicamente’l 28 d’avientu, señala ca añu a empreses y alministraciones pola so responsabilidá en actuaciones que dañen gravemente’l mediu ambiente asturianu; esti añu tienen difícil apuntar namás qu’a ún
La Coordinadora Ecoloxista d’Asturies abrió la convocatoria de la trixésima tercera edición del premiu La Bullada Purpurina, un anti-galardón col que’l collectivu quier facer visible la actuación d’empreses, istituciones y alministraciones que, al so xuiciu, destacaron a lo llargo del añu por polítiques y práutiques claramente anti-ecolóxiques, con un impactu especialmente grave sobre’l territoriu y la salú ambiental d’Asturies.
Na edición pasada, correspondiente a 2024, La Bullada Purpurina recayó en Nieves Roqueñí, entós conseyera de Transición Ecolóxica, Industria y Desendolcu Económicu del Principáu, pola xestión que la Coordinadora calificó de desastrosa dientro de les competencies del so cargu.
En 2025, la nómina de candidatures foi especialmente abondosa. Tres una selección que la organización define como particularmente complicada, llegaron a la final una serie de responsables que, según la Coordinadora, brillen por méritos propios. El xuráu va tener agora la ingrata xera d’escoyer un únicu nome, magar que les razones pa señalar a toos ellos seyan más que abondoses.
Una de les candidatures ye la de Belarmina Díaz Aguado, exdirectora xeneral d’Enerxía y Minería y conseyera, pola so responsabilidá na concesión de permisos d’investigación complementarios consideraos simples tapaderes pa facilitar esplotaciones mineres ensin devolver les ayudes recibíes polos preslles, pola opacidá frente a la vecindá de Peñamayor y Baldornón nos proyectos mineros y pol so papel como facilitadora de decenes de parques de bateríes na zona rural asturiana.
Tamién ta nomada Hunosa, empresa pública, pol so empeñu en quemar basures na térmica de La Pereda ensin tener en cuenta l’impactu sobre la salú de la población vecina, amás de siguir contaminando con emisiones y vertíos en distintes esplotaciones, como nel vertederu de Llangréu.
Otra candidatura correspuende a la Demarcación de Carreteres d’Asturies del Ministeriu de Fomentu, pola destrucción sistemática de les marxes vexetales de les autovíes estatales, una práutica que favorez la espansión del plumeru de la pampa y d’otres plantes invasores, que darréu colonicen los espacios degradaos.
Nel ámbitu de la política autonómica figura’l conseyeru de Mediu Rural y Política Agraria, Marcelino Marcos Líndez, pol so empeñu na eliminación de llobos pa contentar a una parte del sector ganaderu, pol caltenimientu de la pesca de l’angula a pesar del riesgu d’estinción de la especie, por permitir la sobreesplotación de los pocos salmones que siguen llegando a los ríos y por tolerar la espansión ensin control de los ocaliptos nos montes asturianos.
Completa la relación ArcelorMittal, pola so renuncia a la planta de reducción directa del mineral de fierro y, con ello, a los planes de descarbonización anunciaos pa la so factoría n’Asturies. La Coordinadora denuncia que esta decisión supón un chantaxe a la sociedá asturiana, a cambéu de siguir coles emisiones y vertíos que vien contaminando dende hai años la tierra, l’agua y l’aire.
El fallu del xuráu va conocese la selmana que vien y va decidir cuál d’estes candidatures ye considerada la más descalificable nun momentu que la Coordinadora define como vital dende’l puntu de vista mediuambiental. La entrega simbólica de La Bullada Purpurina ta prevista pal 28 d’avientu, como un actu de denuncia pública y de llamada a la responsabilidá ecolóxica.
Nel Dos Santos
This work is licensed under a Creative Commons Attribution 4.0 International License.
