Mientres 7.000 viviendes permanecen vacies, un 46,5 % de la población avilesina afronta precios de vivienda perriba de les sos posibilidaes económiques, una realidá que condiciona de manera directa la vida diaria de miles de persones
La campaña d’Asturies Insumisa vuelve poner el focu na grave situación de la vivienda. nesti casu n’Avilés, onde cuasi la metá de la población vive yá en zona tensionada. Nel conxuntu del conceyu, el preciu mediu del alquiler asitiase pente los 650 y los 750 euros mensuales, lo que supón una xubida cercana al 20 % nos trés últimos años. A esta cantidá hai qu’amestar los gastos ordinarios de caltenimientu de la vivienda y el pagu de los suministros básicos, lo que fai que’l gastu mensual supere con facilidá los 900 euros. Esta cifra queda mui perriba de los ingresos reales de la mayoría de la población, cuyos sueldos nun xuben na mesma proporción. Afrontar esti nivel de gastu acaba llevando a munches families a situaciones de precariedá y probitú, convirtiendo l’accesu a la vivienda nun problema estructural.
Esta situación contrasta cola esistencia d’un númberu eleváu de viviendes ensin usu. N’Avilés contabilícense más de 3.400 viviendes vacíes, lo que representa alredor del 10 % de les 34.244 viviendes del conceyu. A ello hai qu’amestar otres 3.600 viviendes d’usu esporádicu, con una ocupación inferior a trés meses al añu, una realidá que pon de manifiestu la falta d’una política eficaz de movilización del parque residencial.
Dende l’Ayuntamientu d’Avilés defiéndese’l programa Avilés Alquila como una ferramienta pa facilitar l’accesu a la vivienda. Sicasí, los datos amuesen el so alcance llendáu. En 2025 formalizáronse 175 contratos d’alquiler con un preciu mediu de 465 euros mensuales. Dende la so puesta en marcha en 2012 y hasta l’actualidá, el programa sumó 691 contratos, lo que supón una media de 53 al añu, una cifra claramente insuficiente pa influyir de manera significativa nel mercáu del alquiler. Na mesma llinia, el Gobiernu asturianu impulsó’l plan Alquilámoste pa estender esti modelu al conxuntu d’Asturies, ensin que, de momentu, seyan visibles efectos reales sobre la baxada de precios.
Dende Asturies Insumisa considérase que estes iniciatives resulten nidiamente insuficientes y queden mui lloñe de resolver el problema de fondu. La campaña defiende la necesidá d’activar polítiques más ambicioses, capaces de movilizar les miles de viviendes vacíes esistentes, regular los arriendos afitando precios másimos acordies cola realidá social y los ingresos de la población, y promover un parque de vivienda pública al marxe de los intereses privaos.
Llucía F. Marqués
This work is licensed under a Creative Commons Attribution 4.0 International License.
