La distancia pente l’incrementu de salarios y del coste de la vida abre, tamién nesti sector, una fienda qu’algama una perda d’un 24% de poder alquisitivu nos caberos quince años
La situación salarial del emplegu públicu torna ponese nel centru del alderique dempués de que’l Sindicatu d’ensiñantes asturianos, SUATEA, espunxera esta selmana’l so malestar énte la reunión convocada pol Ministeriu de Tresformación Dixital y de la Función Pública pa presllar un nuevu alcuerdu retributivu. La organización sindical destacó qu’esiste un deterioru salarial de gran caláu que, según los sos cálculos, vien afectando al personal funcionarial, llaboral y estatutariu dende 2010 y qu’hasta’l momentu nun recibió una rempuesta afayadiza.
L’avisu parte d’un datu clave: la perda d’un 24% de poder adquisitivu nel periodu 2010–2025. Nesi mesmu tiempu, l’IPC estatal medró un 38,5%, ente que los salarios del funcionariáu namái avanzaron un 14,5%. Esa descompensación implica una carga ca vegada más fonda pa miles d’emplegaos públicos que vieron cómo la vida encareció a un ritmu muncho mayor que les sos nómines. Sicasí, la propuesta que ta sobre la mesa —una subida d’un 11% en cuatro años— ye considerada polos sindicatos como insuficiente y alloñada de la realidá económica que vive’l país.
Un de los puntos que’l sindicatu ta poniendo con más énfasis enriba de la mesa ye la falta de recuperación íntegra de les pagues estraordinaries recortaes en 2010. L’impactu acumuláu de esi recorte, tres quince años, podría superar los 18.000 euros brutos nel conxuntu del personal públicu, anque nel casu d’un puestu A1 la cantidá perdida podría algamar 67.000 euros. Estes cifres, que’l sindicatu llevó al Ministeriu, tán sirviendo pa exemplificar la dimensión real d’un problema que, según defenden, nun se resuelve con axustes parciales nin con promeses de futuru.
Ante esti panorama, desixen que’l Ministeriu abra la puerta a un alcuerdu que non namái corrixa la perda acumulada con un xorrecimientu mínimu del 16,1%, sinón qu’afite darréu un mecanismu d’actualización estable venceyáu al IPC, cola intención de que’l salariu del funcionariáu nun vuelva quedar a desman de la evolución de los precios. L’oxetivu, indiquen, ye blindar la capacidá adquisitiva y torgar que se repita un periodu tan llargu de retrocesu.
La organización sindical pidió una rempuesta clara y responsable per parte’l Gobiernu y señaló que, si la negociación d’esti miércoles nun apurre un avance sustancial, valorarán un calendariu de movilizaciones, ensin esaniciar la posibilidá de convocatoria de xornaes de fuelga. Con esti avisu, SUATEA y la Confederación Intersindical busquen que l’alderique salarial del sector públicu forme parte de la axenda política inmediata, nun momentu nel que les presiones inflacionaries siguim afectando a los ingresos reales de gran parte de la plantiya pública.
Nel Dos Santos
This work is licensed under a Creative Commons Attribution 4.0 International License.
