Decenes de persones concéntrense en Xixón contra la violencia machista baxo’l paragües de Stop Violencies
Ayerí, decenes de persones tornaron a concentrase xuntu al edificiu de la Gota Llechi, en Xixón, siguiendo la convocatoria mensual que, cada últimu miércoles de mes, entama la Plataforma Stop Violencies pa visualizar el doliosu contador de muyeres asesinaes y pa reiterar la refuga social ante los crímenes machistes.
La concentración, que se cellebra dende va años con un ritual cívicu y silenciosu, coincidió esti mes cola xornada posterior al 25 de payares, Día Internacional de la Eliminación de la Violencia contra les Muyeres, lo que dio un mayor pesu simbólicu al actu. Según recordó la organización, el númberu estatal de muyeres achuquinaes ascendiò de 73 a 82 nel caberu mes, una cifra que respiga y qu’implica una víctima más que l’añu pasáu per estes feches.
Nel trescursu la concentración lleéronse con solemnidá los nomes de toles víctimes mortales d’esti añu, que van dende los 3 a los 93 años, un xestu pensáu pa evitar l’anonimatu y pa remembrar que cada asesinatu machista ye una vida truncada y un círculu familiar estremáu.
Respaldaron l’actu diversos coleutivos feministes, sindicales y sociales: Andecha Astur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del serviciu d’ayuda a domiciliu (SAD), Podemos y Verdes–Equo.
Na intervención féxose notar que la concentración mensual cobra un significáu especial por coincidir cola fecha internacional contra la violencia machista. Nel testu lleíu fízose alcordanza de les hermanes Mirabal, asesinades en República Dominicana en 1960, iconu universal de la llucha feminista «Foron muyeres fuertes y trabayadores, asesinaes por oponese a un réxime totalitariu que, como suel asoceder, odiaba a les muyeres. El so exemplu obliga a siguir xuníes contra l’oxetivu común de baltar el patriarcáu.»
El comunicáu denunció ensin ambaxes la responsabilidá del agresor frente a los discursos culpabilizadores: «Nun pararemos de gritar que la culpa nun yera nuestra nin de dónde tábemos nin de cómo vístiamos. Sempre ye del agresor.» Nesi sen llamóse l’atención sobre la persistencia de discursos públicos que minimicen o xustifiquen los crímenes machistes. Mencionaron les declaraciones d’un alcalde y de familiares d’una víctima nun pueblu de Madrid, tratando de xustificar a un home condenáu por asestary 50 puñalaes a la so muyer. Tamién se citó’l casu d’una forense de Sevilla que, según denuncia la prensa estatal, culpabilizó a víctimes d’agresiones sexuales con frases como «¿qué te esperabas que pasara?» o «algo habrás hecho».
Pa la plataforma, toes estes actitúes llomben la llucha y favorecen a los sectores negacionistes «Cuando creíamos que esti tipu de discursos taben superados, vuelven voces radicales que acaben por señalar a les víctimes y por exculpar a los asesinos».
Les convocantes insistieron en qu’el asesinatu ye solo la parte visible d’un fenómenu estructural:
abusos sexuales infantiles, agresiones, acosu, violencia sicolóxica y económica, control, sobrecarga mental y familiar, desigualdá llaboral, brecha salarial o discriminación sanitaria «Podríemos siguir hasta mañana pero lo esencial ye alzar la voz y desixir que los sistemas de protección funcionen».
El manifiestu preslló pidindo más medios, más formación profesional y sistemes de xixilancia eficaces, con referencia al sistema Viogén, que sufriera fallos técnicos nel últimu añu «Nun podemos permitir más errores. Queremos vivir en paz. Queremos que les muyeres y les nuestres fíes y fíos tén protexíos.»
El mes que vien l’aconceyamientu mensual cellebraráse de martes, por coincidir el miércoles cola festividá de Fin d’Añu.
Llucía F. Marqués
This work is licensed under a Creative Commons Attribution 4.0 International License.
