Esti vienres nagúrase nel CIFP d’Hostelería y Turismu de Xixón la esposición itinerante La muyer en Xixón, Asturies (1934-1937), que percorrerá centros culturales, de FP y secundaria del conceyu
El CIFP d’Hostelería y Turismu de Xixón acueye esti vienres la inauguración de La muyer en Xixón, Asturies (1934-1937), un proyeutu subvencionáu pol Conceyu Xixón dientro del área de memoria democrática, y que va itinerar nos meses vinientes per centros de Formación Profesional y secundaria y centros culturales xixoneses.
La esposición naz de la collaboración ente la Fundación Asturies XXI y l’Área de Memoria Democrática municipal, cola mira de poner focu nel papel de les muyeres asturianes nos años que van dende la Revolución d’Ochobre de 1934 a la cayida del Conseyu Soberanu d’Asturies y Llión. La muestra ta comisariada pola investigadora y xestora cultural Alma Hidalgo, autora d’un trabayu que xune investigación histórica, restauración fotográfica y divulgación pensada pa un públicu mozu.
El proyeutu susténtase nun fondu llargu d’investigación y recuperación documental, que permitió reconstruyir la presencia —siempres fundamental, poles más de les vegaes invisibilizada— de les muyeres d’aquel periodu. El procesu incluyó la restauración dixital de decenes de semeyes procedentes d’archivos públicos y coleiciones privaes, formando una fototeca temática centrada na vida cotidiana, el trabayu, la resistencia y la implicación social femenina.
Les imáxenes recueyen escenes de vida privada, llaboral, obrera, movilización popular, actividá sindical y solidaridá vecinal, y retraten una Asturies que sostenía la vida en plena represión y guerra. La fototeca inclúi materiales orixinales restauraos y documentación complementaria accesible por aciu d’un códigu QR, pel que l’audiencia va poder llegar a conteníos audiovisuales, testimonios orales y documentos d’archivu, que ya pue escanease en tolos istitutos de Xixón.
La esposición ta enfocada especialmente a moces y mozos d’ente 12 y 16 años, polo que incorpora testos pedagóxicos y contestualizadores preparaos pa facilitar la comprensión del papel de les muyeres na vida política, social y familiar d’aquelles décades convulses.
Dempués de la inauguración, La muyer en Xixón va percorrer institutos y asociaciones culturales del conceyu, col enfotu d’averar la memoria democrática al ámbitu educativu y al texíu social llocal.
Más qu’una esposición, ye un actu simbólicu y reparador: una manera de devolver a les muyeres el llugar que la hestoria-yos negó y d’enfortiar la memoria democrática asturiana dende l’emoción, el respetu y la reconocencia colectiva.
Nel Dos Santos
This work is licensed under a Creative Commons Attribution 4.0 International License.
