El paru y la precariedá llaboral siguen siendo un problema reinal n’Asturies. Los datos más recientes amuesen que 18.000 llares asturianos tienen a tolos sos miembros en situación de desemplegu, y suma 1.200 nuevos paraos ca añu.
Un repunte que xenera inquietú
Nel tercer trimestre de 2025, la tasa de paru n’Asturies asitióse nel 9,85 %, con un aumentu intertrimestral de más de 1.600 persones ensin trabayu. El descensu con respeutu al añu anterior ye mínimu, lo que indica que la recuperación llaboral ta siendo práuticamente inesistente.
En setiembre rexistróse un aumentu mensual de 1.219 paraos (+2,5 %) fasta algamar los 49.517, la cifra más baxa pa un mes de setiembre dende 2007, pero col retrocesu del emplegu nel sector servicios como principal focu d’allerta.
Les condiciones qu’agraven la situación
Los llares onde tolos sos miembros activos tán ensin trabayu son la cara más dura del paru estructural asturianu. Les causes son les polítiques del Estáu español p’Asturies de desindustrialización y l destruición del texíu soico-económicu tradicional, lo qu’acarreta temporalidña, dependencia de sectores estacionales, perda de pesu de la industria tradicional y una tasa d’actividá baxa —del 52,47 %, una de les más baxes del estáu—.
Agora mesmo la mayoría de los nuevos paraos proceden del sector servicios, el más importante económicamente, pero tamién el más inestable. Les sos cifres apunten a un deterioru continuáu del mercáu llaboral asturianu, ensin una diversificación clara.
Consecuencies pa les families
La falta total d’ingresos nuna llar tien efeutos que van más acullá del paru: dificulta’l pagu de los gastos básicos, aumenta’l riesgu d’esclusión y torga l’accesu a préstamos.
Según el informe AROPE 2025, el 20,9 % de la población asturiana ta en riesgu de probitú o esclusión social, una cifra que se dispara ente los llares con tolos sos miembros desemplegaos.
Qué se pue facer
L’alternativa pasa por finar coles polítiques de desindustrialización y de destruición del texíu socio-económicu asturianu, dexando de seguir apostando pol turismu estacional como única alternativa d’emplegu p’Asturies:
- Promover emplegu estable y de calidá, non solo más contrataos curtiu plazu.
- Apostar por sectores con futuru, como la economía verde, los servicios sociosanitarios o la innovación rural.
- Desendolcar polítiques activas d’emplegu que s’adapten al perfil asturianu: población enveyecida, menos mocedá activa y presencia creciente de muyeres
This work is licensed under a Creative Commons Attribution 4.0 International License.
