El llagar de Piñera convirtióse nel escenariu d’un momentu históricu: la presentación del proyeutu CIDEREU, una iniciativa qu’alluga a Asturies y especialmente a Xixón y Nava como centros de referencia dientro de la cultura sidrera europea. El plan, financiáu pola Unión Europea con 253.000 euros, tien como oxetivu revalorizar la sidre y la agricultura tradicional como motores d’identidá, caltenibilidá y cohesión social

La firma definitiva del alcuerdu pola Asamblea Europea foi calificada como “un gran fitu” por Jorge González Palacios, conceyal de Relaciones Institucionales del Ayuntamientu de Xixón, que abrió’l actu con un mensaxe d’entusiasmu. El programa, financiáu al 100% pola Xunión Europea y que va desendolcase pente 2026 y 2027, inclúi la participación de Italia, Eslovenia, Portugal, Chequia, España y Asturies, tando prevista la organización de trés grandes eventos internacionales, con Xixón como sede principal.

Nel so discursu, Marcos Abel Fernández, presidente de la Fundación Asturies XXI, recordó el llargu percorríu que llevó a esti momentu, dende los primeros alcuentros internacionales nel Salón Internacional de les Sidres de Gala (SISGA) va quince años, hasta la creación de la rede Cider Cities en 2023. .

Pel so llau, José Ramón Fiaño, presidente de la Fundación Caja Rural de Xixón, amosó l’orgullu de la so entidá por formar parte del proyeutu dende’l principiu: “Ye una manera de defender y protexer el nuesu padremuñu cultural, d’una cultura que nos xune como persones y como ciudaes”.

Álvaro Alonso Ordaz, secretariu xeneral de la Cámara de Comerciu, destacó que la entidá nun podía quedar al marxe d’un proyeutu qu’asitia a Asturies y a Xixón nel centru del mapa sidreru d’Europa. Sostuvo que la aprobación de CIDEREU ye “el colofón a años d’esfuerciu y el puntu d’arranque pa consolidar la cultura sidrera como motor económicu y social”.

El zarru del actu corrió a cargu de Jesús Martínez Salvador, conceyal d’Urbanismu y portavoz del Gobiernu municipal, que calificó’l día como “un impulsu decisivu pal futuru del sector sidreru asturianu”. Añadió que “supón la confirmación d’un trabayu bien fechu y la garantía de que la ruta marcada ye la correuta. Agora toca siguir sumando”.