L’amenorgamientu de neños nes aules ta venceyáu direutamente al desplome de la natalidá y al avieyamientu de la población y estos vienen del baxu nivel de vida y la ruina capacidá alquisitiva de los asturianos. Según el INE, a 1 de xunetu de 2025 había n’Asturies 36.946 neños de 0 a 6 años, con namás 4.704 nacíos nel últimu añu
Asturies enfrenta una fonda mengua d’alumnáu nes etapes d’educación más tempranes. Los datos del Ministeriu d’Educación, Formación Profesional y Esportes amuesen que’l segundu ciclu d’Educación Infantil —pa reciella ente 3 y 6 años— perdió un 31,4 % de los sos escolinos na cabera década. La matrícula baxó de 23.370 escolares nel cursu 2014-2015 a 16.040 nel 2024-2025.
El retrocesu intensificóse especialmente nel últimu cursu. Dende 2023-2024 hasta 2024-2025, Asturies perdió 831 escolinos d’Infantil, un 4,9 % menos nun añu, porcentaxe mui superior a la media estatal, que se queda nel -2,6 %.
La rede pública asturiana ye la que más nota l’impactu. Los centros públicos perdieron 564 escolinos..
Los especialistas del Ministeriu d’Educación advierten que’l descensu d’Infantil ye un “termómetru demográficu” que pronostica mengües similares nos niveles siguientes.
El problema de la natalidá baxa tien una fondura social y económica evidente. L’informe El futuru (demográficu) ye’l presente, de Funcas, calcula qu’Asturies ye una de les rexones europees con mayor cayida de nacimientos nos últimos quince años: un 38 % menos ente 2008 y 2023. Los motivos tan nidios: la precariedá y falta de perspeutives vitales, la emigración de la mocedá ya’l consecuente avieyamientu de la población. Les consecuencies, la despoblación, l’abandonu de les zones rurales, la perda de formes tradicionales de vida por falta relevu, la perda de poder políticu, la perda de futuru.
Nel Dos Santos
This work is licensed under a Creative Commons Attribution 4.0 International License.
