Les Xornaes Internacionales d’Estudiu de l’ALLA entamen n’Uviéu la so edición númberu 43, tres díes de conferencies, comunicaciones y presentaciones centraren la actividá académica nel Edificiu Históricu de la Universidá
Les Xornaes Internacionales d’Estudiu de l’Academia de la Llingua Asturiana (ALLA) arranquen la so edición númberu 43. L’Edificiu Históricu de la Universidá d’Uviéu acueye tres díes d’intensa actividá académica —ente’l martes y el xueves— con conferencies, comunicaciones y presentaciones abiertes al públicu hasta enllenar aforos.
El programa d’esta edición abre con tres conferencies de gran interés. Juan Carlos Moreno Cabrera, de la Universidá Autónoma de Madrid, presentará El asturiano y la dialectología españolista; Xulio Viejo Fernández, de la Universidá d’Uviéu, echará una güeyada Dende l’Ástura hasta la mar: entrar n’Asturies al traviés de la toponimia; y Hugo Carbonnelle, de la Sorbonne Université, va falar de Los sufixos asturianos -ón1, -on2 y -ón3: una historia del morfema protorrománicu /-‘on-e/.
El miércoles van pronunciase les conferencies de Pascual Riesco Chueca (Universidá de Sevilla), sobre’l Léxico diferencial al sur del Duero: pervivencia y sustitución, y de Javier Giralt Latorre (Universidá de Zaragoza), dedicada a les Afinidaes ente la toponimia mayor asturiana y aragonesa. El xueves, presllarán el programa les intervenciones de Jairo Javier García Sánchez (Universidá d’Alcalá), alredor de los Resultados del llatín sursum, con sub-, na toponimia hispánica, y d’António Bárbolo Alves (Universidade de Trás-os-Montes e Alto Douro), en coautoría con Henrique Manuel Pereira (Universidade Católica Portuguesa), con Guerra Junqueiro i l mirandés: ancontros i zafios lhenguísticos i culturales.
Les Xornaes inclúin tamién diez comunicaciones repartíes en cinco meses de trabayu, con temes que van dende’l Nueu Canciu Astur hasta la lliteratura asturiana na emigración cubana, amás d’aspeutos de traducción y d’estudiu etimolóxicu. Completen el programa dos presentaciones: Ana María Cano González y Carlos Lastra López van amosar los conteníos más recientes de les revistes Lletres Asturianes y Ciencies: Cartafueyos Asturianos de Ciencia y Teunoloxía, ente que Claudia Elena Menéndez Fernández y David Guardado Díez van presentar Nuevos proyectos lexicográficos de l’Academia de la Llingua Asturiana: estáu actual y perspectives de futuru.
Susana Sela
This work is licensed under a Creative Commons Attribution 4.0 International License.
