La Coordinadora Ecoloxista denunció énte la Confederación Hidrográfica del Cantábricu y la Conseyería de Mediu Rural un nuevu vertíu contaminante que pue apreciase en forma d’esplumes nel ríu Nalón, a l’altor de Coto, nel puente de l’Entregu.
L’asociación alertó de que les esplumes tuvieron hores baxando pel calce y de que yá s’alcontraron decenes de truches muertes nes orielles, nuna estampa que s’estiende a lo llargo de varios metros del ríu.
Dende la Coordinadora desplicaron que, anque se desconoz la procedencia exacta del vertíu, esti tipu d’episodios son “endemasiaos avezaos” nos ríos asturianos pola permisividá qu’esiste col mal furrulamientu de munches depuradores y colos vertíos autorizaos d’empreses que, según señalen, “emiten más de lo permitío o con una calidá peor de l’autorizada”. Estes infracciones resulten difíciles de detectar nel momentu en que se producen, lo que favorez la impunidá.
La organización ecoloxista recuerda qu’ ‘estos vertíos súmense a una “llarga llista d’episodios contaminantes” que se repiten una y otra vegada nos ríos del país. “Cada poco tiempu prométese que va desapaecer esta llacra, pero los fechos demuestren que sigue produciéndose con una frecuencia que tendría qu’avergoñar a les autoridaes competentes”, afirmen.
Los efectos d’estos vertíos son graves y visibles: “Tien un impactu notable sobre los pocos peces que quedan nos ríos, que yá tán debilitados poles males condiciones de l’agua, la escasez de caudal y l’aumentu de la temperatura”, denuncien dende’l colectivu.
La Coordinadora Ecoloxista reclama que les alministraciones competentes recueyan les muestres correspondientes y emprendan actuaciones “clares, contundentes y efectives” pa frenar la contaminación fluvial. “Nun podemos siguir convirtiendo los nuesos ríos en cloaques”, apuntaron, recordando’l “considerable retrasu” que tien la depuración de les agües residuales urbanes. Miles de persones siguen vertiendo ensin depuración dalguna, bien pola inexistencia de depuradora, bien pol mal furrulamientu o mala dimensión de les qu’esisten.
“El problema ye grave y les alministraciones siguen ensin ser quien a frenar los vertíos que dañen el nuesu mediu natural”, conclúin dende la organización, qu’alerta de que los incumplimientos ambientales son yá una constante preocupante en Asturies.
Susana Sela
This work is licensed under a Creative Commons Attribution 4.0 International License.
