Muévite pola Sanidá Pública entama una selmana d’alderique y movilización p’abrir el debate sobre’l futuru del sistema sanitariu

La plataforma Muévite pola Sanidá Pública presentó esta mañana la Selmana de Movilización y Alderique pola Sanidá Pública, una iniciativa que busca poner na axenda política del Gobiernu y de los partíos los problemes que tán afectando a la sanidá pública asturiana y estatal.

Nel manifiestu lleíu na rueda de prensa, los convocantes foron optimistes y afitaron que “inda tenemos una bona sanidá pública, pero non tou ye para siempres”, y alertaron del “enclín negativu escontra la privatización, direuta o indireuta” de los recursos. Los problemes de la pública son ya visibles y afalen a los pacientes escontra la privada: llistes d’espera desproporcionaes, crisis na atención primaria, dependencia tecnolóxica de les multinacionales…

Muévite pola Sanidá Pública señaló que la sanidá privada pasó de ser subsidiaria a plantegase, cola connivencia -cuando non el sofitu- del gobiernu d’Asturies, como una braera alternativa, col xorrecimientu de pólices privaes y la llegada d’empreses como Rivera Salud o Quirón a Xixón.

Por tou ello, la plataforma fai un llamamientu a la movilización ciudadana, con una gran concentración el 9 de payares a les 12 de la mañana nel Centru de Salú Puerta la Villa de Xixón, pa “frenar el deterioru de la Sanidá Pública y defender un modelu universal y equitativu”.

Previamente, del 3 al 7 de payares tendrá llugar en siete conceyos asturianos un aprietau programa de perinteresantes meses reondes alrodiu del tema, entamando’l día tres cola charra “La salú en toles polítiques”, que sedrá nel Palaciu de Congresos d’Uviéu a les seyes de la tardi; simultaneamente na Casa Cultura d’Ortiguera valoraráse si “Ye l’atención primaria la exa vertebral del sistema sanitariu”. Al día viniente l’alderique desplazaráse a les siete la tardi al Palaciu de Valdecarzana, n’Avilés, onde se falará de “Público y privao na sanidá asturiana”; el mesmu díi a les seyes de la tardi nel Cientru Social El Coto de Xixón tocaráse’l tema de “La salú mental, diálogu pente xeneraciones” y na Casa Cultura de La Felguera a la mesma hora falaráse de “L’atención primaria, en cientru salú que necesitamos”. El cincu de payares la Escuela de Música de Mieres acoyerá a les seyes la conferencia “Llistes d’espera, el camín seguru a la privatización” y a les siete na Casa de Encuentros de Piedres Blanques presentaráse’l llibru “Toda persona” de Sergio Calleja. Al otru díi el Centru Municipal de l’Arena en Xixón  trataráse’l tema “El futuru de los curiaos y l’atención sociosanitaria”. La cabera intervención anantes de la concentración tendrá llugar nel Salón d’Actos d’UXT Uviéu onde va falase de “El futuru de la Sanidá Pública Asturiana”

La convocatoria parte d’una alianza amplia de sindicatos y movimientos sociales, ente los que tán CC.OO., UGT, C.S.I., la federación d’asociaciones de vecinos, colectivos de pensionistes, asociaciones de consumidores, profesionales de la Sociedá de Medicina Comuñal y de la Sociedá d’Enfermería d’Atención Primaria, amás de plataformes ciudadanes d’Avilés, Mieres, Llangréu y Asturies.