La tercer edición del certame, prevista pa los díes 1 y 2 de payares de 2025, reafita’l puxu de la cultura moza n’Asturies con una programación que xune música en direutu, artes visuales y propuestes multidisciplinares.

El primer día, un de payares, l’actividá va desenvolvese na sala Acapulco de Xixón, con conciertos de Triple Malta, Los Acebos y Bisonte, acompañaos d’un DJ set y d’una muestra artística de David Marcos Elena y Amanda Moriyón. El 2 de payares, la programación treslládase a Uviéu, al Espaciu Flechazu, con les actuaciones de Eli Barahona y Antonio Irún y Los Lobos, amás de la continuación de la esposición.

Dende la organización despliquen qu’Emerxentes busca dar voz a la creación nueva asturiana, favoreciendo el contautu ente disciplines y la collaboración ente artistes. “Queremos visibilizar lo que ta naciendo agora mesmu, crear rede y dar espaciu a los talentos que vienen puxando”, indiquen los entamaores.

Les entraes adelantaes pa Xixón tendrán un preciu de 10 € (12 € en taquilla), y les d’Uviéu rondarán los 4 €, una tarifa pensada pa fomentar la participación del públicu mozu.

Col so formatu ampliáu a dos ciudaes, Emerxentes 2025 aspira a consolidase como un puntu de referencia pa les escenes creatives del país, un escaparate onde la mocedá, la esperimentación y la collaboración siguen marcando’l camín de la cultura asturiana contemporánea.