El concursu fotográficu más importante dedicáu a la cultura sidrera yá tien ganadores. La edición númberu diecisiete del Concursu Internacional de Semeyes LA SIDRA confirmó la so proyección internacional y el altu nivel artísticu de los participantes
El fotógrafu rioxanu Eduardo San Vicente resultó ganador del XVII Concursu Internacional de Semeyes LA SIDRA, certame entamáu pola Fundación Asturies XXI y patrocináu pol llagar Sidra JR, que yá se consolidó como una referencia internacional na promoción artística de la cultura sidrera. La obra de San Vicente, titulada “Gotes que cuenten hestories: escanciando tradición”, valió-y el Primer Premiu del concursu, dotáu con 700 euros y la Medaya d’Oru de la Confederación Española de Fotografía (CEF).
El fallu, fechu públicu estos díes, destacó’l nivel artísticu de les obres presentaes, con una participación asemeyada a la de la edición anterior. La imaxe ganadora capta con gran fuercia espresiva’l momentu d’echar un culín, símbolu por escelencia de la sidre asturiano.
El Segundu Premiu, con 200 euros y la Medaya de Plata de la CEF, foi pa Juan Carlos Hernández Fernández pola obra “Siempres ta con nós”. El Tercer Premiu, dotáu con 100 euros y la Medaya de Bronce, consiguiólu Francisco J. Domínguez García pola semeya “Sidre cardiosaludable”.
Tamién se concedió la Mención Especial “Sidra JR” a Óscar Chamorro Flórez pola obra “Llavaeru botelles”, que retrata con sensibilidá y tonu nostálxicu’l trabayu artesanal de los llagares asturianos. Esti galardón inclúi 100 euros y dos caxes de Sidra JR.
El xuráu tuvo presidíu pol fotógrafu asturianu Luis José Vigil-Escalera “Lujó Semeyes”, Maestru de la CEF y Excelencia FIAP, con una reconocida trayeutoria espositiva y docente y numberosos premios nacionales e internacionales.
La entrega de premios y la inaguración de la esposición coles obres ganadores y finalistes va cellebrase’l 14 de payares na Sidrería La Galana (Plaza Mayor de Xixón). Dempués, la muestra formará parte de la esposición itinerante “Semeyes de LA SIDRA”, que percorrerá distintos espacios sociales y culturales a lo llargo del prósimu añu.
El concursu y les esposiciones venceyaes cuenten col sofitu del llagar Sidra JR y la sovención de la Conseyería de Cultura, Política Llingüística y Esporte del Principáu d’Asturies.
Susana Sela
This work is licensed under a Creative Commons Attribution 4.0 International License.
