Na Plaza’l Parchís de Xixón concentráronse ayeri cientos de persones pa desixir la llibertá total de la Flotina y la lliberación Darréu de los prisioneros del sionismu, tanto de la actual Flotina SUMUD como de la anterior.
La concentración, convocada en poco marxe de tiempu, amosó una vegada más la solidaridá del pueblu asturianu col pueblu palestín, nun momentu nel que la opinión pública internacional sigue con atención los ataques na mar dirección a Gaza.
L’Armada israelina volvió atacar n’aigües internacionales a un grupu de barcos d’activistes que trataben de romper el bloquéu criminal impuestu a Gaza. La coalición Flotina de la Llibertá–Thousand Madleens, compuesta por nueve embarcaciones con destín a la franxa palestina, denunció que los buques militares d’Israel arrodiaron y secuestraron la flotina nel riscar del miércoles.
Na tripulación había mélicos, activistes y representantes políticos, que llevaben más de 110.000 dólares en melecines, equipos respiratorios y suministros nutricionales destinaos a los hospitales de Gaza, en situación d’emerxencia humanitaria. “Foron secuestraos xunto cola ayuda vital que portaben. El so paraderu sigue siendo desconocíu”, desplicó la organización.
Dende la coalición internacional recordaron que Israel nun tien nenguna autoridá llegal pa detener a voluntarios internacionales n’agues internacionales. “La incautación de les embarcaciones viola descaradamente el drechu internacional y desafía les órdenes venceyantes de la Corte Internacional de Xusticia (CIJ), que reclama un accesu humanitariu ensin torgues a Gaza”, señaló David Heap, del Comité de la Flotilla de Canadá. “Los nuestros voluntarios nun tán suxetos a la xurisdicción israelina y nun puen ser castigaos por intentar llevar ayuda humanitaria nin por desafiar un bloquéu illegal. La so detención ye arbitraria, illegal y tien d’acabase darréu.”
La Flotina de la Llibertá, activa dende 2008, ye conocida pol asaltu al barcu Mavi Marmara en 2010, nel que fueron asesinaos diez activistes y feríes más de cuarenta persones. Dende entós, la iniciativa lleva una docena de misiones pa denunciar y romper el bloquéu de Gaza.
“El nuesu deber como méldicos y periodistes ye dicir la verdá y defender la vida”, declaró’l doctor italianu Ricardo Corradini, ciruxanu xeneral y miembru de la tripulación. “Esta misión ye una llamada a los nuesos colegas y a les instituciones pa que rompan el silenciu, defiendan la ética profesional y se coloquen del llau correutu de la historia.”
Tamién viaxaba’l bomberu español Rodríguez Dos Santos, que afirmó dir “con munchu ánimu” y recalcó que l’oxetivu de la flotina ye “intentar romper el bloquéu xabaz d’Israel, qu’actúa como si tuviere impunidá dafechu sobre la franxa de Gaza.”
Hai que recordar que’l barcu “Conscience” yá fore bombardeáu por Israel frente a les costes de Malta en mayu de 2025. Huwaida Arraf, miembru del comité direutivu de la Flotina a bordu del Conscience, desplicó que “ye’l barcu más nuevu y más grande d’esta flotina histórica, y el so nome representa non solo la resistencia firme al bloquéu ilegal d’Israel, sinón un llamamientu a esconsoñar la conciencia del mundu.”
Na tripulación viaxaba tamién Isaline Choury, güela y bisgüela de 83 años, descendiente d’una familia de combatientes de la resistencia contra’l fascismu na Segunda Guerra Mundial. “Lo que Israel-y fai al pueblu palestín —ya seya xenocidiu o apartheid— xustifica que me xubiere a esti barcu a la mio edá”, afirmó con determinación.
Dende Thousand Madleens to Gaza recordaron que “durante décades, la ocupación israelina, el apartheid, la llimpieza étnica y la violencia ensin fin fueron financiaes y protexíes por gobiernos, empreses y instituciones internacionales. Nun vamos callar más. Pa avanzar, el mundu tien d’enfrentar la realidá de la opresión: el colonialismu nun ye una reliquia del pasáu, sinón un sistema que sigue bien presente güei.”
Llucía F. Marqués
This work is licensed under a Creative Commons Attribution 4.0 International License.
