CCOO d’Asturies  reclama al conseyeru de Ciencia, Industria y Emplegu que promueva’l cese del direutor d’operaciones y de la responsable de Recursos Humanos tres una sentencia que califiquen de demoledora

El Xulgáu de lo Social númberu 4 d’Uviéu condergó a la Sociedá Mixta de Xestión del Suelu (Sogepsa) por vulnerar los drechos fundamentales d’una delegada sindical. La sentencia, que inda nun ye firme, recueye que la empresa intentó apartar a la representante ensin siguir los trámites llegales y vulneró’l so drechu a la llibertá sindical, la garantía d’indemnidá y la so intimidá, al espardese ente la plantía la demanda na que figuraben datos mélicos de la trabayadora.

El responsable de Construcción de CCOO na contorna d’Uviéu, Gonzalo Riestra, señaló que la direición de Sogepsa “nun quería a esta delegada porque resultaba incómoda pol so calter reivindicativu” y que “fizo lo imposible por revocala”.

Criquiquen tamién la actuación d’una representante del sindicatu CSIF, que durante’l xuiciu declaró a favor de la empresa, lo que’l sindicatu considera una falta d’empatía con una compañera y un alliniamientu col comportamientu empresarial que la sentencia declaró contrariu a los drechos fundamentales.

Dende la Secretaría d’Acción Sindical de CCOO d’Asturies, Damián Manzano pidió que’l Gobiernu asturianu depure responsabilidaes: “El conseyeru de Ciencia, Industria y Empléu, Borja Sánchez, ye’l presidente del Conseyu d’Alministración de Sogepsa, polo que tien de promover el cese inmediato del direutor d’operaciones y de la responsable de Recursos Humanos, principales causantes d’esti conflictu”.

Manzano añadió que la sentencia ye “demoledora” y que’l sindicatu “espera que nun se use dineru públicu pa recurrila”.