Asturies echóse a la cai en solidaridá col pueblu palestín nuna xornada hestórica de movilización en defensa de Palestina y contra’l xenocidiu en Gaza. Les setenta y ocho cases conceyu del país foron l’escenariu d’un clamor unánime: “¡Puxa Palestina libre!”
La convocatoria, llanzada poles asociaciones solidaries y polos colectivos de la mocedá, tuvo un siguimientu masivu en tolos conceyos. Les concentraciones espardiéronse peles redes sociales y grupos de mensaxería, onde circularon cartelos y convocatories, y nun hebio un solu conceyu ensin bandera palestina.En ca concentración lleóse un comunicáu desixendo’l fin de la ofensiva israelina, denunciando l’asaltu a la flotilla humanitaria y reclamando’l respetu a los drechos humanos. Les movilizaciones arrancaron a les siete de la tarde, anque dende la mañana’l movimientu estudiantil universitariu y d’enseñanza secundaria ocupó les cais d’Uviéu y Xixón con pancartes, banderes palestines y conseñes como “Ruptura con Israel yá”.
N’Avilés, depués de la concentración oficial, una manifestación improvisada percorrió les cais céntriques de la villa. En Xixón y n’Uviéu, les movilizaciones fueren especialmente multitudinaries, con miles de persones enfilando les aveníes principales. Toles movilizacionesfinaron col mesmu glayíu: “Puxa Palestina libre”, siguíu d’un aplausu llargu, como reclamación colectiva de paz y llibertá.
Emma Sánchez, vocera del sindicatu estudiantil, intervino na Escandalera pa denunciar la “hipocresía” de los gobiernos europeos y del Estáu español, a los que acusó de nun mover un deu “pa frenar la masacre”. Criticó l’embargu d’armes anunciáu y “nunca cumplíu” y recordó’l so apoyu al plan de paz de Trump y Netanyahu, al que calificó de “plan de los xenocides”. Sánchez tamién llamó a una xornada de fuelga xeneral el 15 d’ochobre “pa paralizar tol país”. Según les sos cifres, la fuelga educativa d’esti día tuvo un siguimientu del 90 % en centros de secundaria y universidaes.
Mientres, la atención sigue tamién sobre la segunda flotina solidaria que navega hacia Gaza con nueve barcos, dempués de la detención del Global Sumud. Les organizaciones solidaries llamaron a la ciudadanía a “siguir xixilante” y nun dexar que la violencia esborrie’l esfuerciu humanitariu.
La Plataforma 8M de Llangréu anunció pa esti fin de selmana nueves acciones: el sábadu, una intervención simbólica en Sama con sandíes, símbolu que recuerda los colores de la bandera palestina, prohibida por Israel dende 1967. El domingu 5, la cita mayor será en Xixón, onde se convoca una manifestación en defensa de Palestina y pa reclamar l’alto’l fueu.
Susana Sela
This work is licensed under a Creative Commons Attribution 4.0 International License.
