L’autor trabaya en dellos proyectos lliterarios y va participar en dos actos con públicu alredor de La península de las casas vacías, que sumó yá más de 200.000 exemplares vendíos.
Ente los meses de setiembre y ochobre, la Residencia Lliteraria Xixón recibe n’estancia creativa al escritor David Uclés (Úbeda, 1990), autor de la novela La península de las casas vacías, un auténticu fenómenu lliterariu y social con más de 200.000 exemplares vendíos y abondos gallardones.
“Pa la Residencia Lliteraria Xixón ye un honor tener a un autor con una trayeutoria tan esitosa y con una especial conexón con Asturies, que pue vese nos numberosos actos que vien celebrando nel país”, esplica Inaciu Galán, director de la Residencia.
Uclés va participar en dos actos públicos el domingu 28 de setiembre: el primeru a les 17:00 hores en La Revoltosa, y el segundu a les 18:30 hores en Toma3. Los encuentros van tar centraos nes sos reflexones, en formatu entrevista, con delles sorpreses pa los siguidores asturianos del autor andaluz.
David Uclés ye llicenciáu y máster en Traducción ya Interpretación (francés, alemán y inglés). Escritor, músicu y dibuxante, publicó les noveles La península de las casas vacías (Siruela, Premiu Cálamo al meyor llibru 2024, Premiu Andalucía de la Crítica 2025 y Premiu de Lliteratura de la Xunión Europea como candidatu español), Emilio y Octubre (Dos Bigotes) y El llanto del león (Premiu Complutense de Lliteratura).
Foi becáu coles beques Leonardo y Montserrat Roig, y nes sos obres predomina’l realismu máxicu. Uclés trabayó n’Alemaña, Suiza y Francia, y escribió pa Cuadernos Hispanoamericanos, La Vanguardia, Revista L y Actúa. Participó en festivales como Centroamérica Cuenta, Festival 42, FLEM, Book Friday, Literaktum, y cerró la Biennal de Pensament de Barcelona.
El so llibru más esitosu, La península de las casas vacías, foi escoyíu novela del añu 2024 en diverses llistes estatales (#2 en Babelia; #1 en La Vanguardia, El Heraldo y Cadena SER), y ta siendo traducíu a numberosos idiomes.
La Residencia Lliteraria Xixón abrió les sos puertes a finales de 2023 y, dende entós, vien recibiendo a escritores y traductores de procedencies diverses: Galicia, Arxentina, Italia, Madrid, Inglaterra, Francia, Perú o’l País Vascu, ente otros.
Susana Sela
This work is licensed under a Creative Commons Attribution 4.0 International License.
